點解地鐵公司咁堅持將軍澳五十六區唔照原來規劃，起純商業寫字樓，千辛萬苦都要改為起兩幢酒店、四幢住宅同一個大商場呢？原來背後有一個慘痛教訓。
地鐵噚日向西貢區議會講解，有關五十六區最新發展計劃時，地鐵總城市規劃經理姚展，講到要放棄起寫字樓嘅原因，佢就解釋，政府早幾年將全港近二百公頃工業用地，改為商貿用地，淨係觀塘區，就佔咗四十五公頃，有咁大嘅潛在供應，將軍澳起寫字樓，變得好無謂。
佢好感慨咁講，好似當年地鐵東涌機鐵站上蓋發展，就包括一幢優質寫字樓，但勢估唔到，起好幾年，到𠵱家出租率都重係得二十幾個巴仙，佢哋真係唔想又再喺將軍澳重蹈覆轍。
但唔少區議員，好似唔係點同情地鐵，堅持地鐵就算唔起成幢寫字樓，都要諗計，喺計劃裏面要保留一啲地方做寫字樓。
樓市暢旺，代理月入百萬嘅風光日子重臨，利嘉閣跑馬地分行，三月營業額逾六百萬，該行經理梁婉雯，個人就有一百萬落袋，羨煞一眾打工仔。
聽利記執董廖偉強話，呢個分行第一季營業額逾一千萬，而三月條數係公司成立以嚟分行單月最高。咁好數皆因促成唔少大手成交，其中包括天后廟道31號全幢。
另外，中原地產都因為業績理想，所以後勤三月除有八百蚊利是外，首季重可以多發一個月花紅。中原後勤今年一月已出咗一個月花紅，以及加薪五巴仙。
至於美聯集團，後勤都同樣獲派花紅，最高一個月，另每月營業額達標，就可以有二千蚊獎金。旗下港置，後勤亦有一個月花紅。
尖沙嘴旺舖租務活躍，海防道五十一號單邊地舖，六百四十呎，由時間廊以每月二十八萬租用，呎租四百幾蚊，現時由影音店租用，好快就會換畫。
早排市場話，有皮具公司出到每月成百萬，預租Bossini租緊嘅一對栢麗大道孖舖。據悉，新租客查實係謝瑞麟珠寶。
講開舖市，順便一提老手蔡伯能，舊年十二月以三千一百八十萬，買咗油麻地彌敦道五七五號A地舖，一千呎，現由珠寶店以每月十四萬二租用，啱啱以三千五萬，賣咗畀銀寶集團，四個月賺三百二十萬。
沙田牛皮沙村，有一幢雙號A村屋易手，二千一百呎，作價五百五十萬，每呎二千六，聽落唔算有乜嘢特別。
但係聽世紀21奇豐田超講，呢幢係全村唯一一幢建築風格獨特嘅村屋，有室內樓梯直達各層，重用上古式大木門，牆身原來係用磚砌成。呢幢村屋連入契花園約七百呎，屬老地。上手業主喺八十年代初，用七十四萬買入，再花百幾萬起樓。
話說呢個業主來頭唔細，曾經養過幾匹馬，𠵱家重係馬會會員。因已移民，並長時間喺內地工作，所以至肯賣樓。
電郵地址：[email protected]