周一嶽局長話公立醫院急症室收費太過便宜，導致急症室無時無刻唔擠滿人。局長之言，肯定冇錯，大凡求過於供嘅產品，而又唔可以短期內大幅度提高生產量嘅（如石油），只有兩個方法解決，其一係提升價格，令冇真正需要嘅，知難而退，或者人人因此而節約消耗；其二就係維持價格不變，採取先到先得嘅方法，於是用戶大排長龍。公立醫院急症室就係採用第二個方法嚟解決求過於供嘅問題，至於排隊輪候三至六小時去睇流感嘅機會成本，冇人理會，大概基層市民只掛住金錢成本（moneycost），而且佢哋嘅機會成本甚低。
幾年前左丁山揸車俾貨車撞到車頭，警察叫十字車到場，將左丁山送入鄧肇堅醫院急症室，其實自己只係震咗幾震，冇乜事，可以自己行入醫院，只見內裏病人擠逼一起，冇人理自己，呆坐咗一個鐘頭，諗吓要趕返中環開會，於是捉住一位穿制服仁兄問：「幾時先輪到我見醫生？」仁兄上下打量左丁山，問：「有冇痛？有冇暈，行唔行得？樣樣冇就可以走，去睇私家醫生會快好多！」左丁山連忙鬆人，驚佢叫個醫生出嚟阻住晒。
上月，家中長者睇家庭醫生，醫生寫張紙畀佢去急症室，家人送長者入到急症室，嘩，人多到不得了，醫生護士做到索晒氣，忙到抽筋。大家等足三小時，先見到醫生，醫生叫長者留院觀察，幸無大礙。家人回報話，公立醫院醫生護士態度好，做足工夫，只收一百蚊按金。不問保險單（如美國醫院）、不先收現錢（如內地醫院），睇你張身份證就掂。家人十幾個於是話：「交咁多稅都係抵嘅！」香港嘅公立醫院人人讚好，但理智分析話畀我哋聽，一塊成本五百元嘅蛋糕，日日以五十蚊出售，蛋糕生產商一定破產收場，除非政府加多啲稅，給予生產商大量津貼啦。