做得Designer，屋企應該有好多嘢，衫多褲多都係理所當然，本地品牌Fingercroxx主腦Wallace屋企就衫褲鞋襪都多過人，重收埋收埋好多Figure玩具，咁咪好亂？不過Wallace亦深明善用空間之道，將物品歸一再拍牆就搞掂咗大半。咪睇外表冷冷但又OK咁隨和的大男人，原來都好慳家，人哋話食得唔好嘥，佢就用得唔會嘥，將舊屋家具留得都留，真正掏腰包的只係5,000蚊添置家品，就有𠵱家呢個舒服屋企喇！
記者：梁彩燕 攝影：梁細權
ProfileofWallace
3X歲，現為本地街牌Fingercroxx主理人，品牌一向深受潮人愛戴，近期忙於埋首秋冬季創作，亦定期為年輕潮流雜誌撰文。
地區：大坑
間隔：2房2廳
面積：600呎
裝修費：$0
家具費：$5,000
租金：$7,000
客飯廳其實冇任何牆壁做間隔，但儲咗咁多鞋同雜物的Wallace就有辦法，諗出先將物品用大櫃安放好然後就拍牆擺放，但拍牆還拍牆，都要留意唔係乜都向高空發展，堆得太高太多反而好迫兼拘謹，所以Wallace客廳只放了宜家傢俬木櫃ShowFigure同放潮流雜誌，其餘地方都盡量見白，望落感覺就舒服好多。
用得唔好嘥
學Wallace話齋，每個屋企都會有啲分唔到類的物品，唔知點收藏好難搞，所以佢又諗出妙計將佢稱之為「零分類」的雜件長埋暗角，重善用埋公司棄之可惜的Display廣告板同紙箱仔做掩眼，充當Partition間出飯廳，重攤晒手咁笑言：「冇理由將啲嘢攤開晒㗎！橫掂公司都唔要，而且塊板同啲箱仔又係自己牌子嘢，留番都幾有意思！」嗯‥‥‥咁樣都算為環保出番分力喎！
衫褲鞋各自分區收納
Wallace應該係個鞋癡，中學開始儲鞋十幾年，大大話話已經有成80對，都咪話唔癡！因為工作同衫有關，衫多鞋又多，要點擺至好呢？Wallace就仿效公司貨倉的儲物架設計，搵人做咗個啱晒鞋盒Size的鞋架，約5呎闊，層架夠多夠密，剛好放齊所有鞋，而常着的就響地下排晒隊，兼有分隔玄關的作用。
而500件衫褲就放入書房。「有時會響屋企做嘢，衫褲層架放喺書枱後面，就方便有時望望吓Detail位點做呀咁。」衫褲多得很，固之然唔可以隻眼開隻眼閉咁堆埋一齊就算，要收納有法，分類就至緊要！學Wallace將長袖短袖、冬季夏季衫褲分開唔同櫃或區域收藏，系統得來易搵又整齊。
自己砌鞋架
想落手落腳親自砌個鞋架都唔難，只要度啱位，預備適量角鐵及木板嵌砌即可。角鐵通常以呎數計算，10呎長約需30蚊，五金舖有售，同時亦會配備埋原裝螺絲。
木板則可選擇不同Size、厚度或木質。木板及角鐵進行焗漆效果可提高耐用度及防銹，亦可自行髹上色彩，增添美感。
Show品味
矮身雪櫃雖然係豐澤牌，但響面頭貼滿型仔貼紙即時變得酷好多！攝影師話其實加多一百幾十就可以買個大版，Wallace即呻笨！
望落尚算簇新Armchair，Charles&RayEames傑作，是朋友於eBayBit回來的，最終轉到他手，只需千多元有交易！
呢個係日本旅行時睇中並即時訂購的多用途茶几仔，當時價錢約千幾蚊港幣。
無奈收留細佬雞肋
傾傾吓偈發現Wallace屋企有好多嘢原本都唔屬於佢自己（原屬細佬阿祥），屋企頓變收容所，好似好無奈又無助咁，當中包括已經壞咗兼待修的音響、被冷落又唔知封咗幾耐塵的木結他，重有，今年8歲被撫養咗4年的混種摺耳貓鵪鶉！之所以話無奈，皆因原來Wallace怕貓狗，好彩！無論死物定寵物，大家相處又幾融洽喎！
全屋靠3地燈照明
話說回頭，Wallace當初之所以揀呢個單位租住，當然唔係貪佢有4條橫樑阻礙觀瞻喇！而係鍾意全屋被髹得潔白的牆身，畀人感覺好乾淨自然。
而為咗配合番牆身顏色，亦特意挑選相若色系的窗簾，視覺上好似連成一線咁，令整間屋更精神。到咗夜晚只需利用分別站崗於不同角落的座地燈，負責照亮全廳，費用唔使1,500蚊，就有足夠且柔和的光線。
