立法會噚日開始提早喺早上十一點開大會，以往「三點不露」嘅李國寶（圖）好乖，坐到兩點先走，原來因為要聽埋煲呔發表嘅釋法歪論。
八方問寶哥哥，以後係咪會喺議事堂坐耐啲，唔使好似以前兩點半開會，三點一定起身走人，佢就冇正面講，只係話，佢要起早啲身開銀行會議，平時八點開會，噚朝就提早到七點半。
至於釋法，寶哥哥都認為，兩年、五年同七年都好，一定要搞清楚，佢重爆料，話當年佢做基本法起草委員會副主任委員，都有問過如果特首出缺任期點計，點知個個委員都話特首唔會辭職，於是放下不理，冇解決到問題。
見到寶哥哥，梗係問吓佢寶弟弟李國章會唔會辭職去選特首，點知寶哥哥好擔心咁問番記者，「如果我細佬辭咗職咁佢做乜？」嘩！李家咁有水，唔做咪做老闆囉，唔通會失業咩？
傳真︰2623-9278
電郵︰[email protected]