沙維亞嚟咗羅馬就快四個月，踢過幾場波建樹冇乜之時，最近終於做咗單「大嘢」，就係撞傷咗隊友卡斯辛奴，搞到對方周日聯賽作客烏甸尼斯好可能上唔到場！
唔闖禍就唔係沙維亞，二千年歐國盃四強就係佢犯手球，搞到葡萄牙俾法國淘汰。同樣，唔出蠱惑就唔係卡斯辛奴，我求大俠就認為佢極可能係扮嘢，因為最近同球會傾緊續約，重對會長辛斯開天索價；今次重唔幾大入醫院住幾日，等球會輸波，自然會明白佢嘅重要性，最後就咩條件都答應喇！
沙維亞無端端被擺上枱，認真慘情！但係佢老哥都做咗三十幾年人，點解重係咁衝動，練波都咁搏命？今輪聯賽羅馬有四個主力上唔到場，唔使講佢都會正選上陣。家吓搞成咁，分分鐘羅馬失分，自己又冇埋份工，咪盞雙輸！
近期盛傳車路士、阿仙奴有意邀迪比亞路加盟，話佢可能係「新蘇拿」或「新伯金」，所以佢前晚隨隊赴英鬥利物浦受到注目。不過呢位過氣「金童」前晚嘅表現令人失望，祖記再次喺佢退下火線後無耐就入波，今季不知發生過幾多次。唔知倫敦雙雄嘅球探賽後對佢有咩評語？
正當NBA球隊頻頻炒教練之際，啱啱升任做小馬教頭冇耐嘅艾菲利莊遜可謂逆市奇葩，噚日佢就正式獲班主古賓續約四年，而且人工重由一百一十萬美金加至二百五十萬㖭！其實小馬喺莊遜領導下愈打愈勇，近九場贏七場，𠵱家喺西岸坐四望三，難怪佢咁得古老闆歡心喇！
巴塞即將喺聯賽作客硬拼皇馬，雖然暫時領先九分之多，但係如果今場輸波，奪標形勢肯定緊湊；所以早前話受傷要唞兩、三星期嘅隊長佩奧爾，都秘密復操。跑沙灘之餘，重做物理治療希望趕及復出。會唔會係賽前煙幕？好難講，話晒佩奧爾都係隊長，有佢復出好得多。
西維爾後衞查維拿華路先前對馬略卡嘅艾蘭高打踭一事，日前終於有判決喇！呢一踭為佢帶來五場停賽，西班牙足總重話今次嘅判罰已經「減咗價」，原本應該罰佢停賽十二場，不過念佢事後「表現良好」，又去醫院探病、眼淚鼻涕樣樣有，一面誠心悔改，先至對佢網開一面啫！
逢周一至周五見報