鍾欣桐（阿嬌）近排同佢嘅Twins戰友蔡卓妍喺台灣宣傳新碟，喺當地知名度日增，惹嚟一個自稱係阿嬌初戀男友嘅陳冠良（Allen）上電視節目，大爆同阿嬌嘅舊情。Allen話兩人喺澳洲墨爾本讀書時識，拍咗四個月拖，後來阿嬌一腳踏兩船，Allen俾印尼華僑朋友撬牆腳。Allen又話阿嬌入行後，起初都有同佢用ICQ聯絡，但阿嬌紅咗之後就好少上ICQ。
阿嬌前日同記者講唔識得呢個人，重話冇同一個叫Allen嘅人用ICQ聯絡過，不過，Allen就畀咗佢同阿嬌嘅合照傳媒。相入面Allen同阿嬌都幾親暱，重搭住阿嬌嘅膊頭影相，而阿嬌當年就係肥妹仔一名，清純得嚟重好卡娃兒㖭。
阿嬌話睇完相之後，終於記得Allen係佢以前嘅同學，佢噚日話：「我記得佢，但一定冇同佢拍過拖。我好嬲，我覺得佢好似想入娛樂圈，想做宣傳，點解佢要咁樣話我？咁樣傷害我？」
鄭中基同楊愛瑾（Miki）噚日喺大澳為電影《龍咁威2》拍一場踩單車嘅戲，兩個重着埋情侶裝。最近有傳鄭中基女友蔡卓妍（阿Sa）被人見到喺大澳出現，問Miki有冇見到阿Sa，佢話：「吓，冇喎，係咪認錯我係阿Sa呀？」鄭中基即刻插嘴話：「見到嗰個人係咪有近視呀？見到（阿Sa）記得通知我。」鄭中基打個電話畀阿Sa咪得囉，使乜人通知呀？
樂隊五月天近排幫台灣一個金飾品牌拍廣告，其實之前佢哋都拍咗情人節廣告，做咗機械人同超人，今次佢哋喺廣告裏面變身伊甸園中嘅baby，重喺花園裏面好認真咁討論要送乜畀媽媽，結果就話送金飾。馮仁昭覺得呢個廣告搞到伊甸園BB好似好市儈咁，都幾搞笑。
阿倫譚詠麟噚日去港台擔任頒獎嘉賓，佢話現時體重一百六十五磅，希望舉行個唱時可以減到一百四十八磅。問阿倫有冇信心着性感泳褲見人時，佢好得戚咁話：「我就好有信心，亦都夠膽着，自己重會修埋邊㖭。」
台灣搖滾歌手伍佰日前去咗美國舊金山為巡迴個唱作準備，佢到埗後做嘅第一件事，就係去密爾比達市歎台式麵線，佢重大讚間舖富有家鄉味道，𠱁到在場嘅食客非常開心。伍佰重話當地嘅歌迷好熱情，當佢知道表演場地用鐵皮興建時，佢已經勁high咁話要以歌聲唱到屋頂飛起喎。
新藝寶新人葉宇澄（Eugene）噚日去商台接受訪問，只得十九歲嘅佢會喺樂壇走實力派路線，其實Eugene兩年前已經開始為加入樂壇而準備，佢嘅鋼琴技術重已經到達演奏級，真係好犀利。不過加入娛樂圈後，最令Eugene唔慣係置裝問題，因為佢對於時裝完全唔識，搞到公司要請個形象師幫佢執衫，佢承認呢方面自己比較蝕底。
