幾個維園阿伯戙高對腳，因為話題敏感，罕有地收起大聲公和問候民主派的粗口，悄悄耳語對談。「個波蘭佬因為健康差落台，補選那個，應該做兩年定五年定係2+5+5呢？」
「梵蒂岡無特區咁講民主，他們補選教宗，從來沒有按本子辦事，只有圍內118個樞機主教有投票權，推舉誰上就誰上，教徒冇得話事。講真，梵蒂岡都幾獨裁，邊有八百選舉團咁公開公平公正呀。」
「咁講，應該釋法才夠公道，本聖經漏洞多過基本法。或者搵人大班法律專家去睇吓，聖經背後的精神和原意後再選。」
「最精係民主派，平時鬼殺咁嘈，今趟又唔見抗議教廷黑箱作業。照計應該即刻拉隊去堅道，搵陳日君接信，叫教廷進行全球一人一票，05普選教宗，06普選梵蒂岡。」
「美國佬這次好唔夠朋友，唔幫教宗吊命。睇吓佛州那個特里女植物人，活了十五年仍未斷氣，冇理由教宗連一個植物人都比唔上。睇來，可能係FBI從中作梗，唔畀教宗有救，嬲佢成日批評佢哋位大老闆小布殊總統。」
「即是說，個波蘭佬是遭聯邦密探整死的？」
「更有可能係台灣特工做瓜的。怕梵蒂岡跟中共建交，阿扁唔忿氣被掟煲，佢使慣橫手，肚皮中了轉彎子彈無事，個兇手卻會畏罪自殺，咁都得，有乜唔敢做喎。」
「至驚係，死了精神靠山，日日祈禱的曾蔭權變成迷途羔羊，被魔鬼收買，做足十二年魔鬼的辯護士，愛國左派拜神兼契寧波車都冇運行，唔死都廢！」