招財貓，無人不識的日本民間吉祥物，不少商人都會放在店內以招財運，但其實，招財貓又豈止得一個貓樣、一種用途咁簡單。今日的招財貓不僅大玩百變造型，更衍生出各類型精品。木口木面、舉起隻手的形象，Out啦！
記者：尹珊珊
攝影：陳陶鈞、陳智良
點解我識招財？有段古㗎……
話說喺日本江戶時代一個叫「越後屋」的望族出咗個好賭又好玩貓嘅敗家仔，花光家財。有日，佢抱起愛貓小玉講：「想報答我就拎啲金幣畀我啦。」第二日小玉真係拎咗個金幣回家。敗家仔一次又一次咁將金幣輸掉，最後，佢索性跟住小玉睇吓邊度有金執，當佢走到一座廟前，見小玉雙手合十祈禱：「拿走我的手腳，畀多啲金幣我啦！」講完小玉消失咗，留低3個金幣。敗家仔終於覺悟，發憤圖強，重將一樽拿住金幣的貓像放喺門前，擺招財貓嘅習俗亦自此流傳開去。
Q爆新形象
招財貓唔單止識招財，唔同顏色及造型都有唔同功能，好似白貓招福、黑貓除厄運、紅貓保健康、金銀貓招財，重隻隻換晒Cuite新形象，擺多幾隻，重唔行運行到落腳趾尾！
登堂入室玩實用
正宗招財貓有公乸之分，公貓舉右手招財；母貓舉左手招旺氣，不過今日已唔多講傳統呢套，重唔一定喺門口，連廁所都搵到我哋呀！
卡通角色「裝假貓」
永遠人氣嘅吉蒂貓同叮噹愈嚟愈鍾意扮鬼扮馬，今次「裝假貓」咁爆，不過，不論真貓假貓，招到財運就是好貓啦！
售賣點
a/上品堂：旺角彌敦道580號潮流特區2樓2號舖（23855884）
b/西田百貨：沙田新城市廣場第3期（26941111）
c/VIVI：旺角彌敦道580號潮流特區1樓31號舖（21368178）
d/CatsHouse：銅鑼灣怡和街1號銅鑼灣地帶2樓250號舖
e/JCLadies：銅鑼灣時代廣場832號舖（31022718）