英超球隊樸茨茅夫嘅會長文達歷話，會喺四十八小時內公布前修咸頓領隊史特根成為佢哋嘅新領隊。喺老樸前領隊哈利列納過檔佢哋嘅宿敵修咸頓掌帥後，老樸就一直想搵史特根領軍，但史特根以曾係修咸頓領隊，唔想挑起兩隊球迷嘅不快為理由而拒絕咗。不過，老樸𠵱家水浸眼眉，近十二場聯賽只係贏過一場，得三十一分排第十六；於是文達歷再加幾錢肉緊叫史特根掌帥，令佢終於答應。
不過，宿命真係冇得避，因史特根上任後首要任務係同球隊護級，而同老樸一齊爭護級嘅球隊中，就包括修咸頓（佢哋少老樸四分排第十七），睇嚟史特根唔想挑起兩隊球迷嘅不快都唔得。
講開做領隊，英冠韋斯咸準備同佢哋嘅三十九歲前鋒舒寧咸續約一年，好明顯係為佢成為球隊嘅領隊兼球員而鋪路。若韋斯咸他日成功升班，舒寧咸咪有機會同當年英格蘭國家隊前線好拍檔舒利亞帶領嘅紐卡素鍊過？
希斯貝加怕維拉尷尬
德甲聯史特加日前公布簽咗維拉嘅德國中場希斯貝加，喺下季加盟，搞到希斯貝加有啲尷尬，因為德國球會就話好興事先張揚啫，呢種做法喺英超始終少見。不過話時話，希斯貝加成日話驚喺維拉踢得少，唔入選國家隊，今次轉會鍾意用新人嘅史特加，佢終於恨到啦！
摩連奴又出口術？
車路士周三喺歐冠盃主場迎戰德國拜仁前，領隊摩連奴喺車仔官方網話養傷多時嘅芬蘭前鋒科素可踢後備，重大讚科素勁。雖然科素復出我求大俠都好高興，但摩連奴嘅說話就唔可以盡信，猶記得車仔十六強作客巴塞時，摩連奴夠話翼鋒杜夫肯定缺陣，點知杜夫最後正選披甲！
桑拿士飛荷蘭揀蟀
紐卡素有球員打交，但領隊桑拿士無放慢擴軍步伐，喺周日飛咗過荷蘭睇飛燕諾對阿爾克馬爾，據聞佢嘅目標係飛燕諾前鋒古迪、翼鋒卡斯迪倫、阿爾克馬爾後衞高甘及馬田臣。雖然紐記剛公布有五百幾萬鎊盈利，但佢嘅目標有其他大會虎視眈眈，好難同皇馬或者阿仙奴爭！
干維返美報國不成
效力英冠聯雷丁嘅美國年輕球員干維，上周返祖家為代表美國踢世界盃外圍賽，不過就無份上陣，原因係佢對於比賽用人造草球場嘅膠地出現敏感反應，重即刻送院治療！我求大俠覺得美國有心想搞好足運，就應該學埋歐洲咁用多啲真草球場，始終人造草場都會令球員易受傷。