地產代理行齊齊大事擴充，人手自然極度緊張，請極都唔夠。世紀21於是諗到，搞專區考察團，等有興趣嘅人士，可以實地睇吓，話唔定請到嘅機會可能大啲。
聽講，每個考察團為期三日，有興趣可以跟足三日，若只參加一日都得，每日約三十人，走訪世紀21各區共十個分行，行程緊密過旅行團，每間分行，都會派專人解答團友問題。
世紀21話，團友包括已報考地監局試嘅營業員，以及有興趣加入呢行嘅人士，3月底舉辦嘅第一團，參觀過將軍澳、沙田、馬鞍山、牛池灣、黃大仙、鯉景灣及中半山等分行。
世紀21現有一百二十間分行，預期今年內增至二百間，並要再增聘多一千六百人。佢哋話，會通過唔同渠道增聘人手。
唔知佢哋對手又有乜請人新招呢？
薄扶林貝沙灣五座MaisonBel-Air準備開賣，消息人士話，已有單位預留，不過，發展商宣傳工夫依舊做足。本周末搞時裝表演，今日先開「皇者之旅」記者會。
發展商同渣打合作，以一個三千三百萬單位、承造七成按揭為例，可以獲贈二百八十萬分會所積分，以往只送四十八萬分。積分用嚟租法拉利，可以租四百八十粒鐘；幫趁美容服務，就可以免費用一百三十三次。
代理話，其實前晚已經開始接受預留，有四個二十樓以下單位獲預留，呎價萬二，本周六時裝表演當日，會落實成交。
香港利率終於跟隨花旗，開始步入上升軌道，但投資者入市態度仍然積極，吸納低水物業。
利記黃龍智話，資深投資者，剛以四百八十萬，購入北角和富中心十二A座連租約單位，九百五十二呎，呎價五千零四十二，低市價一成。
單位每月收緊一萬三千蚊租，計落租金回報率得嗰三厘三，但因租約好快期滿，預期新租金會升至萬八，回報有四厘半，都算合理。相信每個月供完樓重有錢落袋。
和富今個月至今已經有三宗買賣，呎價五千四。
加息雖令唔少投資者卻步，紛紛將物業急急減價求售，不過，仍然有人完全唔擔心，反而積極入市。利記黃溢霖話，一名長線投資者，最近以二千四百六十幾萬，一口氣買咗四個馬鞍山帝琴灣。
所買單位，分布凱琴居同凱弦居，全部都係過千呎嘅大單位，成交價由五百六十萬至七百二十幾萬，呎價四千五百幾至近五千。
黃溢霖重話，因為近期豪宅市場嘅氣氛特別熱烈，又多人換樓，所以個投資者先咁睇好中價豪宅。
電郵地址：[email protected]