清明過後，大市估計重係浮吓沉吓，大升大跌都唔會。留意啲近期跌幅已大嘅藍籌，吼佢哋嘅C輪，喺低位收集。
中移動C輪：中移動（941）上月11日派成績表，芬佬收貨，股價喺6日內由25元最高升至26.70元，𠵱家回落到25.30元，調整5.2%，差唔多重見派成績表前嘅水平，係時候博正股好番上去，趁低位撈C輪，對象有兩件。第1件係4571，6月尾夠鐘，輪價10.7仙，同兩周前高價相比，差唔多冇咗1半，溢價2.3%，槓桿率23.6倍（有效13倍），引伸波幅20.1%。第2件選擇3870，明年3月到期，輪價23.9仙，溢價5.4%，槓桿率10.6倍（有效6.7倍），引伸波幅18.8%。
太AC輪：太A（019）上月中最高67.25元，調整到𠵱家61.75元，相信好快止跌回升，趁低位收集C輪，對象係3528，11月尾夠鐘，輪價31.5仙，溢價6.9%，槓桿率19.6倍（有效9倍），引伸波幅20.7%。隻輪同兩周前比較，又係跌咗1半。另1隻3509喺9月底到期，輪價30仙，溢價5.3%，槓桿率20.6倍（有效9.7倍），引伸波幅21.6%，都可以列為落手對象，不過條件都係比3528略遜。
澳美滙價C輪：美元呢兩三個禮拜非常風騷，澳元兌美元由0.7999回到0.764（跌4.4%），美元兌其他外幣亦有4-5%升幅。博美元升後回落，外幣C輪有4件可以博，數據與交投最好嘅係澳美滙價C輪3511，用前日收市數據計（外幣不斷跳動），輪價22.1仙，5月尾夠鐘，溢價0.7%，槓桿率27.2倍（有效21.6倍），引伸波幅10.4%。
章盛