「北角呂秀蓮」蔡素玉代表土共，街市式痛罵曾蔭權，呢兩日繼續成為坊間熱論話題！
雖然民建聯頭面人物紛紛同蔡菜子劃清界線，不過盲嘅都睇得到，呢亭係共黨慣常政治伎倆，搵一兩個隨時可以掟落垃圾桶嘅爛頭蟀，例如維園阿伯帶頭衝鋒，放氣球試反應，探虛實，去到太盡就話「唔代表官方」！
蔡素玉事件，據知情人士指出，百分之百代表民建聯官方立場，亦係土共真情「毒白」！土共全線失控作反，向曾蔭權步步進迫，連「委任曾鈺成做教統局局長」嘅天價都經已開出，下一步，就係向曾爵士伸手攞呢樣、索嗰樣，例如工聯會文娛經費、委員會主席、行政會議席位等等！
若然唔畀呢？咪話危言聳聽，下一步，就分分鐘輪到蔡素玉瞓街，棠哥換件T恤抬棺材，大吵大鬧，攻佔香港電台，或者捧出一兩個「左口癲狗」、「愛國大班」，取代長毛等角色，世界輪流轉，好睇過花燈喎今次！
難得曾爵士秉承天主教自我犧牲精神，左邊面受摑，捧埋右邊面俾佢打，笑騎騎話同「北角呂秀蓮」係好朋友！嘩，教宗一歸天、唔通真係咁有感召力？定係曾爵士今次笑裏藏刀，小不忍則亂大謀，過咗七月十號，坐定定，先至整一鑊滅赤反左清場大行動呢？
傳真︰2623-9278
電郵︰[email protected]