田亮早前因為出席過多商業活動屢勸不改而被國家隊除名後，佢多次揚言唔再參加商業活動，但早排佢鬼鬼祟祟去咗杭州拍服裝廣告，雖然佢不停死撐，但結果都係被人踢爆。
前日田亮靜雞雞由北京去杭州，出席代言運動服嘅發布會，但佢遲到七十分鐘，上台就得五分鐘，重要全無歉意，令在場嘅傳媒同客戶等到扯晒火，忍唔住狂噓佢！
前晚活動喺六點半開始，主辦單位請咗大批傳媒採訪，但等極都唔見田亮，內地傳媒等到唔耐煩，有人執嘢離場，有電視台記者更加鬧田亮扮大牌。點解田亮遲大到？原來佢剩係搞頭髮同化妝都用咗一個鐘，佢要求整出一個有動感嘅時尚髮型，撲粉化妝嗰陣，又要粉得嚟有男人味，重先後試着四套運動服，至揀啱出場嘅心水服裝，真係姿整過大明星。
田亮喺活動中例牌誇口點樣為全運會備戰，繼續狡辯自己唔係藝人，一切會以跳水為主，不過佢話喺○八年北京奧運後一定會退役。馮仁昭覺得如果田亮咁專心一意，就唔使被國家隊踢走，難怪連杭州嘅的士司機都批評田亮眼光短淺，話佢唔做跳水明星就乜都冇！
楊恭如近年主力喺內地發展，早排佢喺內地接咗個服裝廣告，日前就幫呢個廣告拍硬照，拍攝場地特登用咗鏡同玻璃做背景。為咗製造飄逸效果，攝影師要求工作人員用風扇吹住佢，但咁樣吹住條裙，好易走光，所以攝影師影相嗰陣都有叫其他人遠離塊鏡，恭如事後話：「好彩都拍得幾順利，冇乜意外發生，真係要多謝攝影師咁畀心機影呢輯相。」
楊麗菁舊年喺台灣發行瑜伽寫真書，佢噚日喺台北開記招，話幫佢出書嘅出版商侵權，重濫用佢嘅肖像賣廣告。楊麗菁話今次告人唔係為錢，佢本書原本賣約七十三蚊港紙，經出版商包裝後，竟變成賣七百幾蚊嘅郵購品，書中重有佢推薦商品嘅廣告頁，佢擔心消費者受騙先決定採取行動。
at17噚日喺尖沙嘴為《抱抱書》義賣舉行簽名會，即場幫二百個讀者簽名，不過成員Ellen就因為彈結他太操勞，搞到左手受傷，重要紮晒繃帶出現，好彩Ellen唔係左撇子，唔係都唔知點樣簽名。原來今次呢本書係佢哋上年九月去英國體驗而寫嘅，當中有唔少相片，at17話呢次體驗重認識咗唔少新朋友㖭。
Toby噚日到新城接受訪問，適逢噚日係清明節，Toby就話喺呢個日子就最懷念張國榮（哥哥），原來佢自細就係哥哥嘅fans，佢話：「喺我十幾歲嗰陣，我知道哥哥會出席活動，於是就求媽咪畀我去見哥哥，哥哥重錫咗我塊臉㖭，哥哥係第一個令我面紅嘅人，佢去世嘅時候我都傷心到喊。」
