日本女歌手宇多田光早前為日本任天堂手提遊戲機DS最新推出嘅遊戲帶拍攝咗兩輯廣告，呢兩輯名為「我返嚟啦」同「遞起手仔」嘅廣告近日喺日本播出，不過唔少睇過呢兩個廣告嘅日本觀眾，都俾廣告入面脹爆嘅光妹嚇咗一跳。
光妹自從二月尾喺紐約舉行過一場音樂會之後，近排都好少喺公眾場所露面。唔知係因為喺美國出碟成績唔理想要暴飲暴食減壓，定係少曝光養尊處優所致，近日光妹為任天堂最新推出嘅飼養電子狗仔遊戲帶拍攝廣告時，滿身肥肉非常嚇人。
喺廣告入面，光妹為咗力sell隨時隨地都可以同自己飼養嘅電子狗仔玩嘅功能，一時喺屋企花園好悠閒咁打機，就算臨瞓前都忍唔住要同自己隻狗仔玩一玩。不過，當光妹側身瞓喺床上打機時，露出佢嗰隻麒麟臂以及龍躉，令唔少日本觀眾嚇咗一跳，甚至懷疑光妹係咪有咗BB。
光妹又喺廣告入面着上一套白色套裝，將佢嘅啤梨身形表露無遺，直頭同香港「好姨」有得揮。雖然光妹向來以實力做賣點，但係肥成咁，連我羅拉都冇眼睇，光妹都係時候減吓肥喇！