香港啲新聞好短癮，好似領匯事件，當日鋪天蓋地，不過三四個月已經冇人理。八方噚日捧讀《大公報》，無意中發現底版有個道歉啟事，同領匯有關。
點解要道歉？原來佢哋舊年十二月二十一日，曾報道有關鄭經翰「涉及期指買賣活動的傳聞，現經查實」，鄭「並無參與任何期指買賣活動，他個人在領匯事件的立場絕不牽涉任何利益。」所以要對傳聞予以糾正，以正視聽喎。
聽聞《大公》出呢個道歉啟事，內部有好強反應，壓力亦好大。咁鄭大班點睇呢？佢就話「清者自清」，並認為《大公》咁做，係負責任嘅做法。咁講，即係會和氣收場解決咗件事啦。
傳真︰2623-9278
電郵︰[email protected]