漫畫最賺錢是周邊產品，不過《死亡筆記》和《NANA世上的另一個我》就唔使靠產品，皆因有潮星撐住！近年日劇、電影及唱片界均受到韓流衝擊，漫畫界亦無復當年《男兒當入樽》、《龍珠》的全盛期，既然有好的創作，咪大家互相幫忙吓囉！
記者：邵超 攝影：周旭文、陳陶鈞
故事大綱
高材生夜神月意外地拾到死神流克的《死亡筆記》，展開他的「正義」執法，L亦為了正義全力追緝奇拿（夜神月），雙方扭盡計謀，第一部以L的死作結。第二部將由L的繼承者M和N展開。
男潮《死亡筆記》Fans自製副產品
《死亡筆記》在上年漫畫節首推旋即沽清，搞到書報攤和漫畫店在漫畫節後兩星期至有書賣，成為04年集英社最暢銷漫畫單行本的全年榜首。平時Hit爆的漫畫總會推出好多周邊產品賺錢，但《死》的小畑健就唔熱衷，搞到中港台瘋狂Fans惟有自製「死亡筆記」、死神流克和主角阿月的手辦模型，同埋阿月的假髮公開發售。
《死》重成功吸納潮流、娛樂和文化界的Fans，Hit爆裏原宿的潮流界！潮流教父藤原浩就係超級Fans，歌手宇多田光和時裝人Wyman都忍唔住分別喺官方網頁、雜誌專欄寫番篇漫畫經，名編劇莊文強重話睇漫畫時，經常忍唔住回頭細讀內容，睇吓情節有冇犯駁，最後結果當然係搵唔到啦！
導演彭浩翔解畫
「呢個古仔是近年睇過最好的日本漫畫，結構好好，好多時編劇都拆唔到的方向，又會俾作者拆到喎。平時漫畫作者將好多情節理所當然化，但呢本漫畫就會將每個角色做每個決定的可能性分析晒，印象最深刻係阿月點樣收埋本筆記，就算俾人發現都有完美解釋。」阿翔話如果有人將《死》拍成電影，都會恨睇，但這本始終是純心理描寫的故事，多對白少動作，都幾難拍㗎。
女潮《NANA》全日跨媒體追捧
《NANA世上的另一個我》在日本推出以來銷量已衝破1,750萬本，港版出到第11期。宇多田光和濱崎步都是超級Fans，上個月日本13個單位的歌手如大塚愛、西川貴教等推出一張向《NANA》致敬的大碟，一出就做埋Oricon排行榜冠軍，再出埋PS2。飾演電影版主角NANA的新歌姬中島美嘉重唔搶住泊《NANA》碼頭咩！
《NANA》原作者矢澤愛是高中女生的神，套套漫畫的場景設定都令不少女生嚮往。例如《近所物語》主角是時裝學校的學生，《NANA》主角娜娜是樂隊BlackStone成員，成日着住VivienneWestwood衫通街走，另一主角奈奈就鍾意着Lolita衫，一句講晒，激潮！矢澤愛更被奉為漫畫界的時裝達人，作品《天堂之吻》和《NANA》曾在潮流雜誌《Zipper》連載，《下弦之月》和《NANA》最後被搬上銀幕，在日本電影低潮期都能引起重大迴響。
故事大綱
兩個個性南轅北轍的20歲少女，大崎娜娜和小松奈奈的名字在日本發音都叫「NANA」，名字象徵着幸福。在東京這個大都會兩女相遇，憑着自己的意志力，開創自己的命運！
電台節目主持人
鄭家輝解畫
「身邊好多女仔睇，主角時裝好吸引，《Non-no》曾經做過一項女讀者調查，其中一項男朋友做咗會加分的行為，就係他要鍾意睇《NANA》和《蜜糖與四葉草》。它的故事好日本，故事背景好有現實感。」
男男、女女入屋
BL漫畫（Boy'sLove，即講述男男之間的愛情）在日本雖然被抨擊有助歪風，模糊了一眾少男少女的性取向云云，但潮流就係潮流。鄭家輝說池袋太子酒店附近，更新開了一間BL漫畫店，人流好旺。而日本電視終於肯在深夜十一時段播放該類動畫。最有趣是BL一直壓住GL（Girl'sLove），Fans嫌畫風稚嫩，但就慢慢有上揚趨勢，其中《帽子的旅人》和《瑪莉亞的凝望》就係近年代表作，重吸納埋男Fans。
Fans解畫
腐女：喜歡看純BL、H或BL-H的女生
「女仔邊個唔鍾意靚仔，雖然BL有好多露骨畫面，但畫風靚，美男子又多！而且男男的戀愛關係，其實是異性戀觀點，受君總是柔弱可愛臉孔的少年，容易代入受君角色，一啲都唔當係搞基。」
流行動漫新品速報
銷售點：宇宙船（23902708）
