反曾亂港抗壽大行動，由有「北角呂秀蓮」之稱嘅民建聯核心人物蔡素玉做爛頭蟀，突然在政府公帑嘅香港電台，用一啲帶有中國農村特色嘅英語，大罵當撈曾上位，唔係靠能力，而純係靠好運！
蔡菜子又痛批當撈，係前港英人物，同所謂「愛國陣營」文化情感都格格不入！蔡菜子又厲聲警告：當撈必須要「反思」其四十年來嘅所作所為！
蔡菜子呢個節目，名為「香港家書」，並非一時爆嘴癲雞，而係一早錄定音！經過深思熟慮，有計劃、有預謀，完全係代表全線土共嘅心聲大逆爆！
蔡菜子話當撈係「夠運」，咁佢自己以咁嘅料，做到立法會議員，若然唔係民主派去年配票失敗，又點輪到佢呢隻Quali做到立法會議員？簡直係目中無人兼夾大言不慚！
當撈前日作出官方回應，話按《基本法》規定，佢係署理特首，多隻字都唔講，本來幾得體，唔知點解，唔知係咪俾人撩咗兩嘢，昨日突然畫蛇添足，話蔡菜子同佢係「好朋友」，相信佢講嘅嘢係「善心」！
咁嘅回應，實太低B！有失身份，兼自作多情！你當佢好朋友？朋友係咪會咁樣公開落面、抹黑兼唱衰嘅先？正所謂：道不同不相為謀，蔡素玉話到明，我哋土共「愛國」，你煲呔同民主派一條線，即是叛國，你當佢朋友？佢當你係階級敵人喎！
大陸幾十年來，死人都唔知死幾多，就係好多人誤信共產黨係「朋友」！毛主席生前話：「誰是我們的朋友，誰是我們的敵人，這個問題是革命的首要問題！」
蔡素玉狂噴一輪，連民建聯頭目陰陰笑，話佢「唔代表」該黨，不過，曾蔭權都應該改變吓自己性格嘞咁講，陰陽怪氣，笑裏藏刀，可見土共對曾某，係幾咁恨之入骨喎！
身為特首，對於呢一種無聊言論，若然吓吓都要回應，咁曾蔭權第日咪好唔得閒？重有，民建聯馬力都經常炮轟港台用公帑，唔肯做政府喉舌，攻擊特首老董，咁蔡菜子今次以港台做炮台，公然抹黑唱衰特首，咁又點計？抹黑得一次，你怕咗佢，就有第二次，第三次，廢董招呼咗土共足足七年，最後俾土共唾棄，睇嚟曾蔭權都難免步廢董後塵喎，係咪？
傳真︰2623-9278
電郵︰[email protected]