兩年前四月，香港成為疫埠，張國榮又跳樓，成個香港一片愁雲，諗番起都驚。好彩沙士一去未復返，香港人亦從災劫中喘過氣來。八方最近報過郭家沙士小孤雛兩歲生日，咁啱又收鍾尚志（圖）最新消息，同大家分享吓。
鍾尚志本來係中大醫學院院長，呢位華仁仔，係內窺鏡手術權威，亦係中大最年輕嘅講座教授。沙士時，佢以無比道德勇氣，公開疫症已向社區擴散的消息，後來辭去所有職務，遠赴巴布亞新畿內亞行醫。如果講沙士有帶來好處，得到好處嘅可能就係巴布亞新畿內亞嘅病人。
關於鍾尚志嘅消息，對上一件係佢啲內窺鏡在當地被人偷咗，呢個賊真冇陰功，幸好有人捐錢買番。最新就係佢出咗本書，叫做「刀下留人」，講三十個真實故事。佢話希望本書能鼓勵香港人，特別係遇挫折嘅青年人，不好因一時困難而放棄理想。
傳真︰2623-9278
電郵︰[email protected]