煲呔今次真係樹大招風，鬼叫你贏得咁輕易，梗係有好多人唔抵得，眼紅啦。
煲呔為人世界，實知見好要收，馬上擺出一個可憐樣，重喺教堂追思教宗彌撒時掉下男兒淚，真係場面感人。
今日適逢清明，八方驚佢會去山東掃曾子墓，於是早早打定電話畀煲呔位新秘，問佢老闆會唔會返內地，順路又去深圳見吓廖暉？
當奴仔（煲呔新秘英文名都叫Donald）一口咬實一定唔會去。至於掃墓呢？八方就問遲半步啦，原來煲呔噚日晏晝（唔使返工咩）已經提早去咗拜山，唔知佢有冇向老父曾雲報告好消息，就係曾家即將出一個特首，此乃光宗耀祖之事，請老父及列祖列宗保佑保佑，等佢排除萬難，更上一層樓。
煲呔嘅父母都葬喺柴灣歌連臣角天主教墳場，堪輿學者一去到都話嗰度風水甚佳，重話佢嘅後人喺雞年會走馬上任當大官，呢句話係老董下台後先講，梗係啱啦。
傳真︰2623-9278
電郵︰[email protected]