世事幾巧合，噚日八方寫《大公報》有文章批評梁振英不分緩急輕重，點知該報昨日同一個專欄，又有一篇署名文章讚番振英哥。兩篇文章出現在同一個版，同一位置，差唔多同樣長。四月一號嗰篇作者叫「喬小橋」，昨日嗰位叫「李思維」。不過大家都知，呢類文章用乜嘢筆名唔重要，而一篇鬧一篇讚，當然亦唔係有中國特色嘅言論自由咁簡單。
話說第一篇文，主力批評梁振英拒返港開特別行會，順帶批埋佢公開表示不滿特區政府推動CEPA不力，「讓渴望和諧穩定的廣大市民擔憂」，出手好重。李思維篇文，幫振英哥反擊咗後一項指摘，話行會成員「支持政府非指支持全部行為」，條大題目重話《梁振英為專業界請命》，擺明兜巴星咗喬小橋一嘢。至於不返港開會一事，李文就隻字未提。
傳真︰2623-9278
電郵︰[email protected]