拍攝電影現場有幾樣小法寶，價廉物美，好使好用。
「大力膠紙」：拍攝現場幾乎每個工作人員都有一卷大力膠紙傍身，攝影組用嚟黐在地上記位置畀演員企，服裝組用嚟在背後黐住過闊嘅衣服突顯身形線條，茶水組用嚟黐一小片在茶杯蓋上寫上姓名以資識別，道具組則用嚟乜都黐，話明係道具，只求美觀，不求實用，大力膠紙大派用場。
「晾衫夾」：燈光組經常要在燈前換上不同顏色的濾光紙營造不同氣氛，晾衫夾一鬆一夾，是燈光師傅的恩物。
「木攝」與「二四六」：「木攝」就是那種用來攝門腳的門攝，「二四六」則是一塊樓梯級形的小木頭，分別有二、四、六吋高，拍攝電影經常要鋪車軌讓攝影機順暢地運行，遇上凹凸不平的地面，大量「木攝」與「二四六」便可將地面鋪平，攝影組有兩大箱這樣的法寶，可以倒到一地都係，頗為壯觀。
最強力的法寶是飯盒及茶水阿姐自家製的XO辣醬與蒜頭辣椒豉油，還有豆豉鯪魚、茄汁焗豆、腐乳等百搭送飯恩物，一大班人揸住兜飯，大家互相交換餸菜，暫且拋下上半日的辛勞，辛苦搵嚟自在食，食完盒飯再搏殺過。
大力膠紙、晾衫夾、木攝與飯盒，看見地上有這些小法寶，便知道附近應該有人拍戲，錯不了。