禮拜三歐冠盃米蘭打吡呢個戲碼一啲都唔新鮮，但又不失號召力，預計首回合將有紀錄性嘅二百三十萬鎊（約三千四百萬港元）門票收入，而次回合應該都唔少得去邊；扣除開支兩隊踢完兩場齋計門票至少各執二百幾粒，認真和味，可謂未踢已「雙贏」。
AC上一圈主場對曼聯嘅門票收入係一百七十五萬鎊，已經係AC球會紀錄，但同今次比都差一大截。今時今日踢兩場波保證可以賺到笑，話唔定雙方高層已經開緊香檳慶祝。
講開又講，啱啱嗰輪意甲改期，對參加歐冠盃嘅意甲三雄有利有弊；例如AC米蘭本來想利用上周六對布雷西亞場波操番起舒夫真高狀態，同樣祖雲達斯亦想利用對費倫天拿令尼維特重拾比賽節奏。家吓如意算盤打唔響，AC米蘭惟有喺禮拜日狂操體能，國米亦加操兼踢練習賽，一於同對方鍊過。
費特歷治捱拳即入波
柏林哈化嘅馬些連奴噚日一頭比利時國旗上場，唔知係咪啲色太刺激，搞到隊友費特歷治「紅晒眼」，同佢半場喺更衣室發生爭執。事後教練話喺入面打好過喺球場打，咁又係呀！容乜易好似保耶同戴亞咁被趕出場㗎！據聞費特歷治當時捱咗馬些連奴一拳，下半場就即刻入波。早知就打多幾拳喇，因哈化最後都係以一比二輸咗畀多蒙特。
羅馬球員續約講價難
羅馬球員呢期排晒隊同會方傾續約，身為大佬輩之一嘅前鋒蒙迪拿就應該喺日內動筆，新合約為期到二○○九年，即係到佢三十五歲為止。據講蒙迪拿呢次肯自降身價，減薪三成（由原來年薪二百五十萬鎊減至一百七十五萬鎊），所以率先傾掂數。連呢個射手都肯帶頭自降身價，怕且其他球員好似古菲、達拉斯都唔使旨意同球會講價囉。
薩比亞夠心水清
NBA嘅木狼噚日贏咗帝王之後，保住出線季後賽嘅希望，球員薩比亞心水夠晒清，佢同隊友講除咗要自己一隊努力拼鬥之外，重要依靠勢勁嘅金塊喺其中餘下一場賽程打敗𠵱家並列西岸第七嘅灰熊。薩比亞嘅苦心同憂慮可以理解，因為木狼同湖人正面臨成為歷來首兩支前年角逐西岸決賽、今季大有可能緣絕季後賽嘅球隊。