英國首席型男祖迪羅（JudeLaw）上年聖誕節向女友施安娜美娜（SiennaMiller）求婚成功後，大家都預計佢哋會好快拉埋天窗，點知過咗幾個月，佢哋非但冇動靜結婚，重有傳聞話佢兩個感情急轉直下，施安娜要重新考慮吓佢哋嘅將來。
二十三歲嘅施安娜一方面向朋友透露佢好唔開心，投訴佢同三十二歲嘅祖迪經常因工作分隔兩地，同時佢亦不滿男友管得佢太厲害，事緣祖迪唔想女友經常夜夜笙歌，蒲夜店同開派對，所以特登接咗部喺倫敦拍嘅電影昅住女友，而且佢重好心急要定結婚日期，施安娜話要多啲時間諗吓，重開始質疑祖迪唔再係佢當初心目中嘅理想男士。
另外，施安娜啱啱獲著名時尚雜誌《Harpers&Queen》選為最佳衣着人士之一，佢排名第四位，僅次於美國女歌手GwenStefani、MarilynManson未婚妻DitaVonTeese同姬蒂摩絲（KateMoss）之後，而祖迪亦俾《君子》雜誌選為英國最有影響力男士之一，排名第九位。
雖然祖迪同前妻莎迪霍絲（SadieFrost）曾經鬧得好唔愉快，但如今事過境遷，佢哋計劃帶三個仔女去度假村玩吓，莎迪話：「我哋曾經好開心咁生活咗十年，𠵱家依然係最好嘅朋友同經常傾偈，我哋重諗住遲啲同班細路去度假村，我真係好期待。」