鄧萃雯前晚以基督教徒身份出席布道會，她坦言十八歲時不停談戀愛，男女關係有如食快餐，對身體無益。當雯女領略愛情真諦後，至今已三年沒拍拖。
鄧萃雯、關心妍和黃毓民等前晚在紅館出席「YEAHSHOW道盡男女苦與樂」，雯女自爆十八歲加入娛樂圈後，便開始不停拍散拖，有幾段情曾經公開，也有很多是地下情。
雯女說：「我以前缺乏愛，不斷尋求愛情，最長嗰次拍拖都只係維持兩年，有啲就幾個月，不停拍拖，好似食快餐咁，快餐食得多對身體冇益，自己又唔知點解要食，愈食愈空虛寂寞。」
雯女表示自從信教後，明白了愛情真諦，現在已三年沒有拍拖，她說：「我又冇唔開心喎，亦唔擔心冇人愛，以前自己好易鍾意人，人哋又好易鍾意我，𠵱家冇都唔心急。」
提到部份基督教友如朱茵都反對婚前性行為，雯女可會反對？她說：「呢個唔係規條，只要你明白愛嘅真諦，就會知如果有婚前性行為，係唔會有婚姻嘅，等於你不停攞試用品，都唔會想去買，咁寶貴嘅嘢留番結婚後，咁先會大家珍惜對方。」雯女又大歎不少女藝人都有地下情，不公開是怕被人批評不合襯或被指炒作新聞，愛得相當辛苦。
此外，關心妍前晚獻唱電影《挪亞方舟驚世啟示》主題曲，又與黃毓民合唱《愛不是保留》，關心妍說：「我前一晚喺上海，之後趕返嚟同毓民綵排，我怕夾唔到，點知一埋位完全冇問題，佢把聲好感性，唔係個個有，可以出碟㖭！」關心妍表示其男友也是基督徒，問她會否向圈中人傳道？她說：「唔可以勉強，要睇機緣巧合，做好榜樣先。」
黃毓民則在會上表示年前封咪事件令他心情相當低落，當時每日都袋着聖經，如有神助，他說：「我以前衰多口成日鬧人、批判權貴，希望董建華落台，望到又點？嚟緊嗰個可能重毒，重識吹口哨、識吹國歌，我𠵱家好少鬧人，但都有人照住，係神呀！」
採訪：馮美茵 攝影：葉君海
