港股似乎有啲抗跌力，恒指最差之時都只係唔見54點，埋單價進帳22點。中海油（883）與和黃（013）係最大功臣，總共扯高恒指30點。暫時都係上落市，高價追貨易坐艇，有平貨做嘢，冇平貨則唔做嘢。
利豐C輪：恒指成份股中，講升幅，最大嘅係利豐（494），收14.85元，升3.9%，創1年以來新高，4日內升0.95元或6.8%。4隻冇成交與冇乜成交嘅C輪，升幅由18%至31%。
就算捉正利豐嘅升勢，要喺C輪身上搵錢都好難。4隻C輪兩隻冇成交，有成交嗰兩隻，金額炒埋唔夠半碟，得5皮多啲，如果硬係要買，3568係正選，年底到期，輪價22仙，溢價2.4%，槓桿率6.8倍（有效4.8倍），引伸波幅29.2%。不過睇中都冇用，全日成交金額4皮幾，唔夠1個散戶胃口。如果買利豐C輪，重要諗吓正股升勢能否持續。
思捷C輪：思捷（330）係第3大升幅嘅恒指股，收55.75元，升2.3%。思捷係股市奇葩，邢老闆愈減持就愈升，耐唔中發吓熱。如果想喺耐唔中發熱過程中搵錢，揀C輪玩，正路貨色係3760，8月初夠鐘，輪價74仙，溢價3%，槓桿率7.5倍（有效5.9倍），引伸波幅28.8%。遠期貨色則揀4718，呢隻交投活好多。
中電信C輪：中電信（728）張成績表唔錯，是日股價則跌兩格，收2.70元，低位買得過。但搵C輪，則有啲傷腦筋，C輪多數冇乜成交，或者數據唔得靚。勉勉強強睇住4500，10月尾夠鐘，輪價18仙，溢價9.6%，槓桿率15倍（有效7.1倍），引伸波幅28.1%。隻輪溢價唔低，揸得耐，好易發覺輸錢。
章盛