教宗若望保祿二世蒙主寵召，走完佢在人世間嘅路程，八方雖然唔係教徒，都對呢位波蘭籍嘅教宗肅然起敬，皆因當今之世，除咗教會有咁嘅力量之外，好難有人可以同共產黨企梗咗咁多年，一啲都唔御。
怪唔得噚晚堅道天主教座堂為教宗舉行追思彌撒，教堂內外都企滿人，煲呔、馬丁、石禮謙同好少露面嘅杜輝廉、吳榮奎佢哋去得早，有位坐；而卿姐嚟遲兩分鐘，入到教堂有位企都算好彩。
追思彌撒由天主教香港教區主教陳日君主持。八方問馬丁有乜感受，佢話作為天主教徒，佢第一反應係好似教宗咁話，「好開心」，因為明知佢一定上天堂，免受病痛之苦；但係過咗冇耐，又忽然覺得有啲失落，心情都幾矛盾。
黎樹雄、司徒世華攝
傳真︰2623-9278
電郵︰[email protected]
