喺中央嘅精密部署下，老董總算平平安安升咗上神枱，八方聽聞，最近佢以前嘅內閣以及手下終於敢蒲頭請佢老人家食番餐飯，一般相信董太都在被請之列，因為唔會咁不近人情啩。
第一場已經擇日喺四月七日、即係呢個禮拜四晚舉行，自願掏腰包嘅主要係前任行會議員，現任聽講都有，人數唔算多，但係好多都比老董先走一步。世事難料，老董可能點都估唔到自己都有今日──被人趕下台。
由第一任計起，星期四嘅飯局都有三幾圍人，舊人包括鍾大蛇、陳太、楊官、小吉、王䓪鳴、譚耀宗、錢果豐、李業廣同鍾瑞明，而葉劉、梁錦松、田少同楊永強應該算係第二任內嘅人，不過，由於今次約得好急，班貴人未必個個可以出席。
至於班賴死唔走嘅行會成員好似棠哥、振英哥、廖長城、曾鈺成、周梁、史美倫、陳智思以及以煲呔為首嘅三司十一局都話嚟喎，到時都幾墟冚。
傳真︰2623-9278
電郵︰[email protected]