人生走到盡頭，想到眼前的一切，不久將會成過去，耳邊總會響起一句：「有得食好食，有得着……好着啦！」面對未知的世界，心裏是莫名的不安，怕露宿街頭？怕一條友孤伶伶？唏，科技進入新時代的同時，紙紮亦揭開新一頁，今時今日住洋樓養番狗、食魚翅啖鮑魚、箍個喱士Bra是等閒事，就算誇到要指定個北姑都OK噃，唔怕紮唔到，最怕你諗唔到！
記者：楊一凡
攝影：陳盛臣、林栢鈞、梁細權
模特兒：阿Lo 鳴謝：滿清皇朝
世界變新貨現 400款成書
俊城行老闆杜千送入行二十幾三十年，坦言紙紮是近年才走物質主義。杜生話當年：「紙紮在文革後興起，但紮電腦和北姑，是近五年的事。世界變，紙紮亦與時並進，人享受多了，自然會替『將來』打算。」
為加強競爭力，店方聘專人做設計，北上在汕頭設廠，大量生產減低成本，「唔係點心邊有$2.8一籠咁平？除了機器印，紙紮多細微摺位，都要人手。」店方還把400多款紙紮印製成書，以便顧客選購，像睇日本雜誌訂貨咁方便。
北姑PS2長今 隨客訂做
紙紮師傅阿豪，身穿舞師紅褲及黑布鞋，他自言從小熱愛紮獅頭，轉型當紙紮師傅後，阿豪多看了雜誌和報紙，行街坐車也經常觀察周遭的事物攞靈感。早前更紮了一部PS2，因為過身的小朋友好鍾意玩，於是應其家人要求，度身訂做，價錢要二千幾蚊，貴過真身。「有些顧客生前較鍾意北上搵北姑，過身後子孫會要求我們做些胸部較大、臀部翹些少的北姑燒，我哋都盡量做到低胸吊帶款。」《大長今》咁紅，可否燒盒錄影帶給先人？無問題，不過訂做價錢會較貴。
1:1狗變馬
最近某當紅電台節目主持人在大氣電波中問：「紙紮間屋咁細，唔係跟足1:1，燒咗點住得落呀？」呢個問題我哋代佢問咗堪輿學家麥玲玲，她說紙紮非1:1是正常。麥玲玲更引述友人施明的故事：當年傅聲死後，她們見他生前愛狗，特地做了隻1:1的紙紮狗燒給他，誰知其後傅聲報夢給施明：「隻狗大到好似隻馬咁呀！」
麥玲玲指點：掃墓五大忌
1.在清明節正日拜山，無分吉時凶時，但切記勿在日落後才到墳場拜祭。
2.清明開墓期由新曆4月5日至5月4日，期間拜祖先最好。清明前五天和後五天切忌搬屋及移動大件家具，以避鬼魂搵容身之所。
3.紙紮品必須寫明長輩和送贈人的名字。例：祖父XXX收孫女XXX敬上，大至房屋小至插頭都要寫明。
4.燒金銀衣紙或紙紮，一定要燒到化晒成灰燼，親人才收到。
5.摺得鬆散的元寶，燒到落地府會變碎銀，摺得實淨的元寶才變大紙。買衣包時記緊看清裏面是否放滿衣紙，曾有無良商人只塞爛報紙。
新貨鮑參翅肚
潮玩新款波鞋
激貴洋樓龍船
（a）俊城行（25474653）
地址：上環皇后大道西138-142號
（b）同安森記紙號（23863208）
地址：深水埗福榮街95號A
提早買花防「山狗」
不少人會在墳場入口才買花，俗語有謂坐地起價，價錢分分鐘較花墟貴一倍或以上。而且更有機會遇上「山狗採花事件」，即是有「專人」趁子孫親友離去後，把墳前的鮮花偷去，循環再用賣給前來墳地才買花的人。
為免祖先難過，不如提早買定靚花。清明時節花墟的花價維持不變，花農說：「清明的花束包裝簡單，不似情人節或母親節般多花臣。通常有宗教信仰的買百合花，現在玫瑰當造，所以今年多人買玫瑰拜山。大多依死者生前喜好選擇花種。」
繽紛園藝鮮花店（23809136）
地址：太子花墟道16號
祭祖套餐$338
將軍澳區酒家，近水樓台推出清明祭祖套餐，以優惠價在清明前幾天推出乳豬套餐及燒肉套餐。平日賣燒味一定切去雞頭及雞腳，清明套餐特色是豬及雞都有頭有尾，另加入其他點心取意頭。若嫌乳豬太多，可以燒肉代替，約平百多元。套餐需於一天前預訂，一般賣至四月中旬。
麗東閣海鮮酒家（26232222）
地址：將軍澳尚德邨尚德商場三樓301號
