喺八十年代好紅、𠵱家甩晒頭髮嘅過氣電視小生，近年好少喺香港，多數都喺內地做嘢，記得佢當年嘅緋聞已經好鬼精采，後來重娶咗個嘅外省靚女做太太㖭。婚後甩毛小生同老婆重生咗兩個細路，不過最終都係離婚收場。佢哋離婚嘅原因，原來有段古，馮仁昭覺得好應該講番出嚟，畀一眾靚太作為借鏡。
當年甩毛小生同外省靚女返去內地居住，請咗個小妹做工人，呢個小妹係外省靚女自己揀嘅，不過佢竟然揀一個後生過自己，重靚過自己嘅小妹做工人，身邊嘅朋友都勸過佢，擺個咁靚嘅女仔喺屋企遲早出事，但外省靚女對老公同自己都好有信心，所以冇理會。
之後甩毛小生同外省靚女離婚，原因好簡單，就係老公搞上咗個工人，𠵱家甩毛小生同嗰個工人，聽講連細路仔都生埋。有啲女人成日提防住唔畀其他靚女埋自己老公身邊，唔係冇道理嘅，何況係日對夜對兼聽教聽話嘅工人，馮仁昭都係勸各位女士小心啲！
林心如出道至今拍過唔同類型嘅廣告，佢日前接受《時尚雜誌》訪問話：「每次只要有新的數碼產品上市，我就會心動。」識林心如嘅朋友都知，佢最鍾意換手提電話，林心如話：「我也不想這樣，可是就是忍不住。」所以佢嘅朋友成日因為咁而受惠，得到佢多出嚟嘅手提電話。
譚詠麟（阿倫）噚日幫節目《都巿閒情》做嘉賓，早前有報道話阿倫將老父送往老人院居住，阿倫解釋：「爸爸行動唔方便，喺安老院有專業人士照顧，我哋之前都開過會做嘅決定，我爸爸有時連我都唔認得，有時好似細路咁要人𠱁，重話要返學。」
廖碧兒同馬國明前晚在中環蘭桂坊一條斜路拍無綫新劇《人間蒸發》，場戲講佢哋兩個喺街頭相擁，吸引數十個途人圍觀。廖碧兒同馬國明身高相若，但拍呢場擁抱戲嗰陣，工作人員幫碧兒墊沙包企上去，當佢發現記者影相時就即刻解釋話：「唔係我矮，係條路斜。」
梁洛施（Isabella）噚日去咗商台接受訪問，對於劉思惠早幾日着超短裙行騷時唔小心走光，重俾人睇到佢臀部有瘀痕同埋女性用品嘅翼邊，Isabella話因為自己一直搞唔清楚着打底褲同絲襪嘅次序，所以有次唔小心失手走光，同埋佢喺唔方便嘅日子通常唔會着裙。
梅雪詩（阿嗲）噚日到佐敦請傳媒好友食飯，對於已經有三十三年歷史嘅新光戲院將會喺今年八月結業，阿嗲都表現得好感慨，佢話八月會喺新光做最後一台戲，阿嗲話：「𠵱家都好難搵地方做大戲，希望政府可以珍惜粵劇，因為粵劇係香港嘅文化。」
孫耀威噚日喺新城電台接受訪問，問佢拍攝亞視劇集《美麗傳說II》同緋聞女友應采兒有冇激情戲，點知佢話：「我戲中同陳法蓉比較多咀戲，都幾激吓，陳法蓉都幾好咀㗎！」佢話每次同陳法蓉拍咀戲都係一take過搞掂，因為大家都好專業喎。
