雖然市面上有好幾隻藥品股，但唔知點解，絕大部份成交都唔係咁熱鬧，其中一個講法係因為藥品股業務性質較難明，投資者睇唔通，所以興趣唔大。經紀黃則唔同睇法，佢話好幾隻藥股基本因素唔差，芬佬一直坐住唔少貨，只係欠缺推廣，成交先至咁淡靜。
好似中國生物製藥（1177）由創業板轉至主板，而過去幾年的生意，由眼藥水發展至家陣多元化，包括肝藥、骨科同埋心腦血管注射液等，反映公司相當進取，過去的收購合併策略奏效。
中國生物製藥上周公布04年全年業績，盈利1.68億元，較去年增長1.06倍，雖然派息比去年少咗，得番4仙，但就2送1紅股，所以即時有證券行調高公司的目標價。
另外，據講公司正洽購一家中成藥公司，重話唔排除透過發行新股籌集資金，呢個可能係股價被踢上的誘因。不過，隻股成交細，好似上周五升5.8％，收2.275元，但成交只有37.6萬股，金額84萬元，想搵人捧場好難。
慕容小初