身兼香港專業服務聯盟主席嘅行政會議成員梁振英，近排好惹火。八方記得早前喺「龍騰飛躍」研討會，佢罕有咁公開查找特區政府不足，重好唔客氣地批評。佢話CEPA推行十五個月，但本港專業服務團體冇乜實質得益，原因有二，其一係兩地專業人士仍擔心惡性競爭嘅心態；另一個原因就係特區政府未有積極推動。佢話有次佢哋十幾個大男人到北京游說拓展國內服務，見到外國係出到外交層次為自己嘅專業人士打開關係，真係睇到佢哋「眼濕濕」!
上個禮拜五，喺《大公報》又見到梁振英嘅消息，今次輪到佢被人批。話說大公個「點擊名人」專欄，寫咗篇署名文章，除咗回應上文CEPA件事，認為梁振英身為行會成員，不應罵自己人；然後再提當日梁留喺北京而唔返港開特別行會撐煲呔曾，係未能分清緩急輕重。
呢篇奇文，大題目係〈梁振英應分清緩急輕重〉，兩條小題目分別係「政府成員批評政府」，「缺席會議情理不合」；稍為識政治者，都知幾重手啦。梁假假地都係政協常委行會成員愛國才俊，喺《大公報》被人轟，係咪有的嘢呢？
傳真︰2623-9278
電郵︰[email protected]