無綫外購韓劇《大長今》播出後收視一直高企，劇中演員深受港人喜愛，無綫節目《娛樂大搜查》早前拉大隊到韓國專訪《大長今》男主角池珍熙後，最近又派出主持李浩林同藝員宋芝齡去韓國同飾演「小長今」嘅童星趙貞恩做專訪，十一歲嘅「小長今」原來入行七年，四歲已經開始童星生涯。
兩位主持約咗「小長今」去韓國首都首爾嘅「韓國傳統文化體驗館」做訪問，「小長今」當然唔會放過宣傳韓國特色嘅機會，佢即場換咗套傳統韓國服出嚟，重同大家行大禮，然後再示範煮韓國炒年糕畀主持人食，認真精靈。「小長今」廚藝絕對唔失禮，最後「小長今」又哼《大長今》嘅主題曲，𠱁得所有工作人員鬼咁高興。
徐若瑄噚日喺台北宣傳護膚品，佢提番喺日本出碟嘅時候，曾經因為太愛食燒肉，體重一度高達四十九公斤（約一百零七磅），搞到佢唔敢着bratop，所以𠵱家梗係着番夠本啦。徐若瑄又俾人取笑佢係「小胖豬」，咪決心減肥，去健身房，又游水、跳拉丁舞同瑜伽，先至瘦番。徐若瑄重話𠵱家體重只要接近「五」字頭，就會即刻去做運動。
噚日一班張國榮嘅歌迷喺九龍灣展貿舉行咗名為「寄語流星 流星語—追憶張國榮的藝術生命」研討會，播放電影《流星語》，之後歌迷就同主講嘉賓討論一吓哥哥後期所主演嘅電影。現場亦有一個攤位售賣有關哥哥嘅書，其中一位嚟自台灣嘅劉小姐更加問朋友借錢買機票嚟香港，出席一連串悼念哥哥嘅活動。
鄭文雅一向熱愛運動，佢被委任為競步大使，噚日同老公齊齊喺中環亮相競步賽，「小小超」李澤楷都有份參賽。鄭文雅好落力為參賽者打氣，佢話：「我平時都行得好多㗎，今日係休息日。我多數打高爾夫球，打每場最少行五公里，所以有相當足夠嘅運動量。」
鄧萃雯前晚同張敬軒去咗紅館，擔任「林以諾牧師大型棟篤笑音樂佈道會2005之吾男吾女」嘉賓，同觀眾分享愛情經歷。雯女話：「男女感情問題糾纏愈耐就變成互相傷害。」提到教宗病逝時，身為基督教徒嘅雯女就話：「希望一個老人家以唔辛苦為大原則，佢有神會上天堂就唔怕。」
