香港大學新聞及傳媒中心訪問教授、前任台北巿文化局局長龍應台（圖），喺新一輪「思索香港」系列文化論壇，請咗國內、台灣甚有來頭嘅人物做主講嘉賓，佢希望各位大學生、非政府組織人士，甚至政府官員都嚟聽聽。
四月十二日同港大建築系合辦嘅《我們的城巿怎麼了？北京、台北、東京的城巿眺望》，主講嘉賓之一梁從誡，係中國文化巨人兼革命思想家梁啓超個孫，佢父親梁思成係清華大學建築系創辦人，曾致力保存北京古城，到咗梁老先生一代，就開創環保大業，成立中國第一個民辦環保組織「自然之友」，呢啲就係真正嘅文化傳承嘞。
五月三日《企業家的人文關懷》嘅講者係全球最大嘅手提電腦生產商廣達電腦董事長林百里，廣達去年營業額超過一百億美元，林先生身家多唔使講，佢嘅出處就萬萬不能不講。今年五十六歲嘅林董事長，少年時代喺香港調景嶺長大，讀嘅係國民黨德明中學，聽講佢因為唔鍾意香港殖民地教育，去咗台大讀電機系，經過艱苦奮鬥，成為國際矚目嘅商人，曾被《商業週刊》兩度評為「亞洲之星」，今次係第一趟喺香港公開演說。
傳真︰2623-9278
電郵︰[email protected]