教宗若望保祿二世蒙主寵召，梵蒂岡駐特區代理人陳日君即時哀爆內幕：原來教宗生前，曾想訪問特區，點知，橫遭中華人民共和國香港特別行政區嘅董建華政權粗暴拒絕！
香港有天主教徒二十四萬，天主教係合法宗教組織，宣揚仁愛，廢董政權將教宗若望保祿二世，當做法輪功李洪志、民運顛覆組織阿頭吾爾開希、國民黨蔣幫餘孽後代馬英九，同埋拉登組織恐怖分子等等劃一分類，等量齊觀，簡直罪大惡極，將來必受耶和華懲罰，在地獄火燄中得到永生！
不過唔怕！黑暗終成過去，託我教宗洪福，香港有天主教徒當撈曾把關，時時同上帝心靈對話，連北上都不忘拜祭傳教士古墓，帶挈全港脫離兇惡，特區從此有運行，真係天佑港人，哈里Lu吔！
一位虔誠嘅天主教徒特首，加埋肥彭親手冊封為英國爵士，佢嘅人格，早經梵蒂岡及英女皇雙重審核，合乎誠哥標準，當然高尚到極，今後又點會助紂為虐，企在邪惡勢力嗰一邊打香港人？係絕對冇可能嘅，你哋話係咪？
正因為咁，當撈上位，引起土共刻骨仇恨，紛紛搞小動作，包括教唆及利用正直、純真、誠實嘅田少，挑戰胡主席六秒黃金握手會，企圖「參選」，挑戰當撈，好在得中央即時厲聲喝止！
一計不成，又生一計，昨日在維園角落近北角方向，就有一群冇乜知識嘅高齡閒人，高談闊論，散播謠言，由中國小農社會大迷信角度，竟然聲稱天主教徒特首嘅當撈「腳頭唔好，殺氣大」，一上位就剋死教宗，好似個仔出世，剋死老母！
簡直係九唔搭八，惡毒夾無聊！對於呢亭擾亂團結、破壞和諧嘅種種陰謀小動作，全港市民，定要擦亮眼睛，提高警惕，緊密團結在以曾爵士為首、陳日君主教為副嘅正義力量周圍，在全港天主教徒協助之下，齊心實踐中央胡錦濤主席及曾慶紅副主席等領導人語重心長嘅教誨，做到振興經濟，穩定和諧！
悼念若望保祿，感謝主佑香港，抵制邪惡勢力，在胡溫中央嘅支持下，一起共創新局，呢一樣，就係梵蒂岡最新帶畀港人嘅啟示！教宗，請你放心，正所謂一路好走，香港人一定會戰勝撒旦嘅！
傳真︰2623-9278
電郵︰[email protected]