話畀人知你有間黑白屋，第一反應唔係「咁咪好型？」就係「咁咪好怪？」。呢間並唔係「黑白戰場」，而係以黑色同白色做主調嘅舒適家居，顏色分工明顯，但仍配合得出奇咁啱Key。而OpenKitchen同BarCounter亦是另一賣點。
記者：梁彩燕
攝影：楊錦文 模特兒：Katie
設計公司：in.tdesigns(31068384)
地區：半山
間隔：兩房兩廳
面積：約1,000呎
裝修費：$700,000(連設計、裝修及內置電器)
家具費：$150,000
唔知大家有冇行開GiorgioArmani，店名風格簡約又樸實、乾淨利落冇多餘擺設，就係因為咁，屋主特別欣賞Boutique內的格調，加上自己特別偏愛黑、白色，所以自己間屋都想做到有種獨特風格。但家居以黑色最主調其實頗有難度，皆因用得太多，會令到成間屋好有壓迫感，為咗擴闊空間，設計師Clifton索性將原有密封式廚房變成OpenKitchen、加個多用途Bar枱、兼將三房變為兩房，盡量減少無謂的間隔，咁全屋可使用空間就立時變得闊落。
精心黑白布局
要做到黑同白的對比，德國白橡木地板、造工繁複的石屎牆、訂做入牆廚櫃等均各具特色，搭配起來效果異常合拍。而玄關位以黑木柱做Partition，可分隔門口、廚房及客廳區域，Clifton更透露該等木柱的另一特點，「因為咁樣可見又可不見囉！」的確，左望右望咁，都幾有神秘感，足見Clifton的細密心思。
而屋主亦為家居進行了精心的布置，例如購置咗畫作、咕𠱸、Bar枱等帶有點「紅」的實用擺設，一來作點點綴，同時又可幫間屋找個Balance。所以眼下的黑白屋，一點都不覺陰陰沉沉。
BarCounter一枱多用
屋主的生活較西化，BarArea就提供咗地方可以開小型Party，是三五知己把酒談心的區域。BarCounter鄰近窗台，加幾個坐墊或咕𠱸，既方便與朋友聚首又可充當飯桌。咪以為Bar枱就係眼見咁簡單，其實作為Bar的一邊設了腳踏，而OpenKitchen那邊卻是多用途組合儲物櫃，實用性很高。
施妙法擴闊視覺空間
通過短短的走廊，入睡房前就發覺有點不同，原來係房門兩邊的牆角被磨得平滑無痕，此舉有助增強空間感，視覺上看多了，亦有引導的作用，感覺就好似要帶你番睡房休息的意思！
要令成間屋黑白等得唔會太Heavy，就要做到有種舒適的感覺，所以大部份家具的底部都採用了凌空凹入的設計，腳部活動範圍增加了，而望落感覺亦輕巧得多。而最關鍵則要數到慳位妙法：玄關鞋櫃，入牆！雪櫃，入牆！以至微波爐、焗爐、音響櫃等等入得就入，呢啲就叫慳位！
而全屋以燈槽代替使用大光燈、射燈或水晶燈等裝置，完全杜絕了刺眼的光源，光線無論從上而下照射，抑或由下而上滲透，都帶有「洗牆」的效果，提供了充足的光線之餘，同時亦使感覺更開揚。
全淨白廁間一門兩用
綜觀整間屋都算有啲顏色，但入到廁所就真係眼前一「亮」！所有物品均以白色做主調，令到原本面積不算大的空間頓時變得闊落。當然亦保持一貫的簡潔，毛巾架甚至企缸內的鏡都以入牆式設計，打開玻璃門就有遮掩毛巾架的作用，絕對係實用至上。而極盡慳位的企缸內，向上望會發現裝咗頂置式大蓮蓬花灑，沖涼時可以同獨立花灑頭交替使用，又有另一番的享受。
如何做出石屎牆？
先用石屎（一般是用菜膠福粉、石膏加水混成）開稀，掃一層上牆，待兩星期完全乾透，再掃一層，餘此類推，直至滿意的效果為止。
