法國運嚟嘅一批印象派名畫，喺尖沙嘴香港藝術館嘅展覽快到尾聲，八方前日趁星期六下晝放假又去捧吓場，喺場內碰到快將退休嘅滙豐亞太區主席艾爾敦，佢同埋一個華籍女性朋友，同啲普通市民一齊迫吓迫吓咁欣賞名畫，真係冇乜架子。睇來佢好欣賞名師塞尚（PaulCezanne）嘅《蓬圖瓦茲的加萊山坡》，企喺度聽講解員講解聽咗好耐。
滙豐係呢個展覽嘅贊助機構之一，二月初開幕時艾爾敦都嚟過，唔知係唔係當時太多貴賓，艾大班要自己再嚟睇過。不過八方覺得個場比較細，而睇嘅人又太多，好多時睇到人頭多過睇畫，有一名女士亦覺得安排唔多妥，當面向艾大班反映不滿，不過大班就話自己只係訪客，做唔到啲乜。
傳真︰2623-9278
電郵︰[email protected]