能夠揚威海外嘅香港玩具人，第一人係MichaelLau，再數必定係EricSo。成名作多得李小龍Figure公仔，但今次Eric唔單止做Figure，重一口氣搞咗4個展覽騷Quali，頭炮係畫展，以塑膠彩為材料，用足一年時間繪製10個「潮人兄弟」，幅幅1:1真人原大，誓要話畀你知，除咗Figure公仔，Eric亦係一個多元化的藝術人才！
記者：胡卓琳
攝影：陳智良
為咗今次畫展，Eric特別製作嘅Figure公仔，於展覽期間發售，配合Benetton向來七彩的Image，共有10色，每色限量10個，夠晒罕有。
頭炮！StandbyMe畫展畫到死為止
問：以「StandByMe」為題，有乜特別意思？
其實Sology係一個展覽Series，「StandByMe」係其中一個展覽名稱，因為由96年到現在，接近10年，我認識咗好多古靈精怪的朋友，喺工作上幫咗我好多，希望藉「朋友」呢個元素做畫展，表揚佢哋。其實十幅畫係可以連成一線，我計劃日後繼續畫落去，畫到死為止，到時拼番埋一幅大畫，肯定好壯觀，哈哈……
問：點解會以畫展作為一系列展覽的序幕？
本身我係畫公仔出身，不過因為我以做Figure成名，所以好多人都會忘記咗，我想喚醒番其他人，其實EricSo係識畫畫，而且好鍾意，甚至比整Figure更甚。
問：為何選擇與FabricaFeatures合作？
作為Benetton的傳訊研究及發展中心，Fabrica致力發展藝術，唔單止在商業化的業務上，其懂得回饋社會，絕對值得我欣賞。喺朋友介紹之下，聯絡上Fabrica，佢哋非常支持我今次的展覽，雙方一拍即合。
EricSoFigure闖名堂衝出香港
屬本地玩具界的著名Artist，EricSo（化名蘇勳）投身流行文化及人形公仔創作逾10年。設計學院畢業後，投身廣告行業，1996年首次舉行個人展覽，1998年開始創作屬於自己的玩具，以李小龍為偶像，Eric創作出擁有個人風格的玩具公仔，廣受世界認同。成名作包括李小龍、Edison及李燦森的ActionFigure，曾經與Sony及雪碧等等合作，多年來遊走世界各地，是少數成功衝出香港的玩具設計人。
今次Eric還原基本步，以畫家身份示人。展覽分4個，打頭陣就係StandbyMe畫展，同期重有Figure展，及接着之後的蠟像展同李小龍時裝展，大家密切留意。
展覽日期：31/3-8/5
展覽地點：FabricaFeatures
地址：尖沙嘴彌敦道23-25號彩星中心地庫
第二炮StandbyMe（Figures）
展覽日期：31/3-10/4
展覽地點：Juice（銅鑼灣百德新街53號2樓）
同日展覽喺Edison舖頭Juice有EricSo的拿手Figure公仔展，人物同樣係StandbyMe畫展的10個人物，不過就以不同造型出現，配合各項個人風格，型爆！
StandbyMeTee$320
於StandbyMe（Figures）場地發售的限定Tee，限量100件，前面係StandByMeLogo，後面有12個製作單位的Logo，包括蘇勳、Devilock等等，除開都係幾十蚊一個，抵玩啦！。
第三炮Actor
展覽日期：13/4-19/4
展覽地點：山頂杜莎夫人蠟像館
展出國際電影明星12吋蠟像公仔，包括占士甸、亞爾柏仙奴等等，不過到時有幾多個蠟像公仔展出，Eric話暫時未知，因為所有公仔都係連夜趕工製作當中。
第四炮TheArtofBruce（2005）
展覽日期：27/4-10/5
展覽地點：各Benetton專門店
將偶像李小龍生活化，仿製出李小龍生前着過的衫，係一個屬於李小龍的FashionShow，展品將於多間Benetton專門店展出。
