好多朋友經常問大使，做《暖流版》咁耐，見盡人世間生離死別嘅慘劇，會唔會令自己都變得好灰、好負面，大使次次都答話「唔會」，跟住佢哋就會問：「係唔係已經麻木晒？」大使又要再費一番唇舌去解釋，以免畀佢哋誤會大使冇同情心。
大使的確見過好多自己想像以外嘅慘事，不過大使識得平衡情緒，好多時候會發掘一啲勵志故事同讀者分享，睇吓身處逆境嘅朋友點樣克服困難，令自己嘅思想都積極啲，唔好遇到小小挫敗就怨天怨地。
大使舊年底就曾經訪問過一位「再生勇士」龍小玲，九七年佢同先生分別患上鼻咽癌同肺癌，先生冇幾耐過咗身，留低兩個好細嘅女畀佢照顧，但佢好積極，重花精神織頸巾送畀住院病友。
如果各位身邊有啲朋友、又或係你本人做人好積極，受盡挫折仍然屹立不倒，大使都好希望你哋可以分享一下經驗，激勵大家。
嚟緊下個月八日就係一年一度母親節，《暖流版》每年都會發掘一啲勵志媽媽嘅故事，頌揚母愛。如果大家有好故事，不妨話畀大使知，電話：29908688。
暖流熱線
電話：29908688
傳真：23702192
電郵：[email protected]
網址： http://www.charity.atnext.com