備受世人景仰的教宗若望保祿二世，於香港時間昨日凌晨三時三十七分在梵蒂岡病逝，享年八十四歲，城中不少信奉天主教的名人和藝人對此深感哀痛。名媛王穎妤和杜黃韋娘都先後到教堂為教宗祈禱及出席彌撒，王穎妤憶述三見教宗的難忘情景時，忍不住淚盈於睫。早年亦曾與教宗會面的周潤發太太陳薈蓮感觸良多，她獲悉教宗臨終時說：「我很開心，你們也要開心，讓我們一起以喜樂心情祈禱。」她感慨：「佢真係好偉大。」
採訪：陳月媚、戴彩煥、朱倬誼
攝影：娛樂突發組、陳月萍
王穎妤：我曾經喺九○年、九九年同埋○○年同教宗見面，覺得好好運，當時喺七萬人當中，只有二十人可以接受教宗降福，我第一次見教宗嗰陣，佢好精神，佢問我「Whereareyoufrom？（你從哪兒來？）」我答佢香港，教宗就話「IknowHongKong.（我知道香港）」原來佢都知道香港呢個地方，而且佢唔會冷落任何人。
到九九年，係我最唔開心一年，因為爸爸病咗，我同教宗講話好唔開心，教宗就話「Godwillbewithyou,don'tbeunhappy.（主與你同在，不要不快樂）」跟住我錫咗教宗隻手一啖。我手上呢條鏈，俾教宗祈過福。
發嫂：每朝早一起身，我都習慣先讀一個鐘頭聖經同祈禱，然後先會開始一天嘅工作，但今日我就先睇新聞，當知道佢離開咗，個心都好down，所以今日我都去咗教堂為教宗做最後禱告。
二十幾歲時我曾經去梵蒂岡接受教宗祈福，當時教宗好精神，佢幫廣場大班信眾祈禱，當時我喺人群中見到教宗好慈祥，佢熱愛世界和平，連臨終都話：「我很開心，你們也要開心。」處處為人着想，佢真係好偉大，佢嘅高尚情操，係好值得世人學習。
名媛李桂蘭九九年七月曾到羅馬參加由教宗主持的公眾彌撒，當時她坐第一行近距離接觸教宗，事後接受訪問時她說：「在美國教會朋友的幫助下，經過數月的張羅，終於替我取得兩張門券，不知何故，教宗一行出來，我的眼淚已經不期然流下，對我來說，這絕對是我一生中的bigmoment。」
而杜黃韋娘昨步出教堂時說：本來我喺歐洲做嘢，噚日返嚟，早知係咁我就唔返嚟住，去羅馬啦。
Kenny：九四年我讀中學嘅時候，學校派四個學生去菲律賓出席『普世青少年』活動，當時參加嘅香港學生有三百幾人，而去到當地廣場有成千人聚集。我記得當陣時有部裝晒防彈玻璃嘅車經過，坐喺裏面嘅教宗，好慈祥咁同我哋揮手，同佢見到面，我覺得同佢好有緣。聽日教宗嘅追思彌撒，希望可以出席。
劉家輝：我細個係讀天主教寄宿學校，記得幾十年前，前任教宗曾經喺大球場舉行過活動，我都有份幫手做扶祭，當年重係要用拉丁文講嘢㖭。呢幾日我都有為教宗祈禱，有啲人希望教宗康復，但我就係希望上主畀佢休息，教宗已經完成天主嘅使命，點解唔畀佢舒舒服服返天主身邊？
羅蘭：我第一次去梵蒂岡見唔到教宗，直至○○年十月一號，我同幾個神父同幾十位教友，一齊去羅馬廣場舉行嘅「封聖」彌撒，先有機會見到教宗，佢當時條頸郁唔到。我噚日都有為教宗祈禱，但我知佢好辛苦，所以已經有晒心理準備。
人嘅生老病死係必然定律，喺人嘅角度嚟講梗係唔想一個人離開，但教友角度嚟講教宗係唔會死，佢係得到永生，喺呢個空間離開佢嘅肉體，去到一個永恒國度；花花世界幾十年，始終都會走。
