蚊型股慧峯集團（八二二八）奇兵突出，與李鵬千金李小琳扯上關係，話投資廣東發電廠，賣電畀香港咁講，專家學者都認為此路未必通，甚表懷疑。哈，唔好理，一隻通訊媒體內容股搖身一變成為電力概念股。股價立即急升六七倍，問你服未？曾以五十二周低價零點零六六六元買入呢隻股票嘅，以一蚊賣出，你話可以賺幾多？慧峯嘅大股東可以興奮到瞓唔着。更加證明「橋唔怕舊，最緊要受」。
對中國政治經濟研究多年嘅Ｃ博士睇完慧峯嘅新聞，對左丁山講：「呢鋪唔簡單，似乎顯示中國要逐漸介入本港重要策略性行業，利用國企嘅財力與技術，強力與本地大財團競爭。照我所知，今日中國缺電，到咗○八年就會電力過剩，到時將啲多餘電力來港廉價傾銷，特區政府好難唔就範。」
如此說來，慧峯只係隻木馬，因利乘便，谷起隻股票賺番一筆，本港電力公司嘅勁敵唔係隻木馬，而係藏在木馬內嘅士兵也。但係分析師E就從另一角度睇，佢話：「中國邊度得閒與本港大財團競爭吖，其實係透過一啲所謂市場手法，徹底控制本港主要策略性行業至真。嗱，先有網通買入電盈股權，跟住傳出國航與國泰商討合併，𠵱家又話一隻小小慧峯引入中國電力國際，司馬昭之心，日益明顯嘞，就係中央要逐漸加強控制，水、電、煤、航空、通訊都在此列，機管局想上市呀，唔好咁肯定，有變數㗎！」咦，呢招叫做打着紅旗反紅旗，有人宣稱話增加競爭，打破壟斷，實則係加強全面控制，分享香港經濟繁榮紅利。再進幾步（唔係進一步），肥佬黎大有機會出售壹集團套現，講唔定有一隻蚊型股與內地巨型公司結盟，收購傳媒，一統天下㗎。