紐卡素嘅保耶同埋戴亞喺上星期六對維拉嘅英超聯自己人打自己人的確羞家，不過，並唔係全部英超球員都係咁不知所謂嘅，好似車路士後衞泰利、曼聯中場傑斯同埋曼城門將占士等最近就同英國全國讀寫基金合作，聯同來自二十間英超聯嘅球員，推介自己覺得最好睇嘅小說，以鼓勵英國家庭多閱讀。
可能由於今次計劃以針對小朋友為主，所以球員嘅推介多數以兒童讀物為主，好似富咸後衞禾斯推介嘅《小王子》、泰利推介嘅《Cool!》同埋愛華頓中場卡斯利推介嘅《煉金術師》等；亦有占士推介老少咸宜嘅《哈比人》，同埋傑斯推介較為嚴肅嘅、前南非總統曼德拉著作《漫長自由路》。
不過，西布朗嘅史米卡竟然推介曼聯中場堅尼嘅自傳。究竟史米卡係覺得堅尼本自傳夠晒真性情，抑或係好好嘅反面教材，所以向大家推介呢？
馬些連奴表忠心變笑話
哈化嘅巴西前鋒馬些連奴先前同球會續約，為表忠心竟諗到喺頭髮度染德國旗。佢貪平去間墨西哥髮廊，個髮型師將德國旗嘅黑紅黃三色位置搞錯咗，結果染咗支比利時國旗上去，今次真係瘀到爆！佢咁慳有原因嘅，佢加盟時以美元出糧，點知美元呢三年狂瀉，令佢每年損失唔少！
里爾淨勝8球今季之最
法甲聯一向係開「細」波膽，日前突然之間爆出一場里爾主場大數伊斯特尼斯八隻蛋嘅瘋狂入球騷，比較荷甲飛燕諾淨數威廉二世七球多一球，成為今季主要聯賽最大比數賽事。里爾主場半場已經贏五球，而五比○同「主其他」波膽都有一百倍，買咗嘅波友肯定半場已經笑到見牙唔見眼。
費sir心淡向車仔投降
曼聯日前主場都贏唔到布力般，費爵爺賽後宣布投降，心淡原因係球員表現完全唔對辦，所以先無晒心機，放棄今季聯賽冠軍。話時話，我求大俠睇完曼聯呢場波，雖然有射中柱，但班球員錯誤頻頻，底線傳底表現，咁樣嘅球隊如果最後攞超聯冠軍，真係無說服力！
熱刺財力深不見底！
碧咸離開皇馬傳聞不斷，重投英超機會愈來愈高，熱刺就成為首間表態有意羅致呢位英格蘭隊長嘅英超球會。熱刺主席利維講，碧咸十萬鎊周薪絕對唔成問題。我求大俠一直都唔明，熱刺年年使咁多錢，又冇成績，點重可以有資本搵碧咸過檔，如屬實，熱刺財力認真唔簡單。