屯門樓價落後大市，唔少租客見供抵過租，慳兩成或以上，所以首期夠嘅都轉軚買樓，搞到上月租務成交比例跌到得番一成半。
祥益董事謝澤銘話，以二手居屋兆隆苑為例，五百零呎兩房賣四十八萬，七成按揭，二十年還款，息率二厘七五，月供一千八百二十二，但係租就要二千九，慳近千一蚊。
至於私樓，市中心指標屋苑屯門市廣場，兩房單位值八十萬，七成按揭，二十年還款及二厘六息率計，月供二千九百九十五，月租約三千六，慳番近一成七。
謝澤銘話，因為利率上升，差餉又增加，業主就算面對租客流失，相信都唔會減租；另外就係好多業主都趁樓價上升出貨鬆綁。佢預期，今個月租務會進一步降至一成二，不過樓價仍可升唔少。
富城八個屋苑，獲社會福利署頒發「愛心屋苑」標誌，成為首批獲得呢個標誌嘅屋苑。
據講，社署為鼓勵業主參加義務工作，由今年至明年底，舉辦「社區是我家由關懷長者開始」活動，凡喺一年內安排至少一項義工活動嘅屋苑，都可以獲發呢個標誌。
八個屋苑係沙田第一城、沙田康林苑、荃灣海濱花園、屯門恒順園、粉嶺綠悠軒及昌盛苑、上水龍豐花園和北角海峰園。
富城董事總經理鄭錦華話，佢哋有二十個屋苑成立義工隊，希望轄下三百多個物業業戶，達到「一物業一義工隊」嘅目標。
中記上月生意額二億五千二，增七成，係九七年七月以嚟新高。中原中國都唔輸蝕，有一億零五百萬人民幣（下同），比去年三月增九成半，首季逾二億三，較舊年多八成。
中原中國賴國強話，上個月深圳、東莞、廣州、上海、南京、大連、天津及瀋陽八市分行，生意破咗歷年紀錄，上海四千幾萬，深圳二千萬，廣州千餘萬。佢估全年達十三億。
佢話，業績好係因為洋房買賣非常暢旺，冇受宏觀調控影響；首季一手成交與去年同期相若，有近一萬宗；二手萬二宗，增倍半。
九龍灣地王效應，帶挈各區甲級寫字樓業主，好似尖沙嘴康宏廣場，美記話二十樓一個單位，由貿易公司用二十四蚊一呎新高承租，同舊年第四季呎租只係十六、七蚊比較，升咗四成有多。
佢話，由於康宏缺乏租盤，加上區內優質盤全部加晒價，好似同屬尖東嘅帝國中心、尖沙嘴中心咁，海景單位造緊二十五蚊，全區最高指標嘅尖西港威中心，就租到二十六蚊。
據中記所知，康宏二十三樓最近曾經造過二十四個半一呎㖭，自從賣完九龍灣塊地，租盤全部見廿字，去番科網熱嗰陣嘅水平。
尖東商廈呎租急升，咁調番轉又會支持到售價進一步上升。
電郵地址：[email protected]