「任你壯闊胸膛，不敵天氣，兩鬢斑白都可認得你。」不知道林夕在《約定》中寫的「天氣」是真的指天氣，還是寓意四季交替，日月如梭。然而，在電影拍攝期間，的確任你是48C胸膛，難敵天氣。
颳颱風與雷暴是死症，冇得救，因為有危險兼冇保險，所以一定唔會開工，但若是遇上下雨天，咁就麻煩。製片與副導演從開工第一天起便會密切留意天氣狀況，如果天氣預測話有雨，而又一直落緊大雨的話，咁樣製片與副導演會揸主意取消通告，避免損失，但若果係天氣預測話有雨，天色陰晴不定但又未落得出雨，咁樣製片同副導演就會問導演究竟去定唔去？其實導演又點會知，只不過導演會權衡製作有幾趕，當天是否拍攝大場面，環顧種種客觀因素之後作出決定。
如果係喺現場拍拍吓落雨，咁就煩，有排都唔會停嘅傾盆大雨反而乾脆，導演可以大喝一聲收工了事，但如果係啲落吓唔落吓嘅長命雨，咁導演都唔知嗌唔嗌收工好，最怕嗌咗收工又啱啱停雨，又或者唔收工但等嚟等去唔停雨。這次拍攝《龍咁威2》，遇上颳五級程度的強烈季候風，連人也吹得動，落雨都有得睇天色估計幾時停，但颳風真係冇得估，隨時起又隨時停，惟有安慰自己風沒有動，只是心在動。等咗一輪，風繼續動，靈機一觸，將劇情改為在大風的環境中進行，想不到演員們在大風之下份外忙亂，反而更自然兼有氣氛，算是一項意外收穫。看，拍電影的人多懂得自我安慰！