上周五，紐約期油又升1.87美元，上到57.27美元，就快重見上月中58.10美元歷史高位。美股因為油價上升，唔掂。外圍如此，港股好難有運行。不過恒指近排已調整相當，再跌幅度亦可能唔會太大，就當短期內再跌150-200點好嘞。
和黃C輪：上周五，恒指跌25點，以點數計，令恒指跌得冇咁多嘅最大功臣，係和黃（013）。和黃收66.75元，進帳0.50元，拉高恒指6.8點。是日和黃高低價幅度1.25元，幅度1.9%，和黃C輪則大得多，以熱門貨為例，3561高低（14.5仙?10.3仙）相差41%，3808高低（25仙?18.9仙）相差32%。做即市揑得準，好富貴。揑得唔準，好閉翳。
大行出報告，對和黃評價好多過壞，但市況唔好，股價都要先跌一跌，跌完有機會彈番上去。大股東如果增持，則更有利股價回升。睇住和黃跌嗰陣，低位鎖定3808收集。隻輪7月中到期，輪價22.9仙，溢價3.8%，槓桿率29.1倍（有效13.6倍），引伸波幅19%。
恒指P輪：大市短期向淡，如果想喺可能下跌一二百點過程中搵恒指P輪短炒賺錢，可向3884埋手。隻輪8月尾到期，輪價22仙，溢價3.6%，槓桿率13.6倍（有效8.4倍），引伸波幅19%。如果港股向下大裂口開出，裂得太勁，則高價追P輪未必有足夠水位。
恒指C輪：港股如果開得太低，高價追恒指P輪冇水位，調轉做，低位買恒指C輪，博反彈，博尾市彈番上去，做即日鮮，對象係3795，7月尾夠鐘，輪價11.8仙，溢價3.1%，槓桿率26.6倍（有效14倍），引伸波幅16.5%。
章盛