陳慧珊（Flora）自從離開無綫後，轉攻內地市場拍劇，近排佢就喺廣州同黃子華、吳鎮宇拍攝劇集《大亨》。早兩日Flora返香港出席活動，雖然之後要即刻趕返內地開工，不過佢仍然抽空同佢位緋聞男友兼經理人鍾家鴻（Mike）去酒店食自助餐撐枱腳。
大前日Flora先後喺中環同尖沙嘴出席活動，但佢只係由女助手陪同，Mike全程未有露面。到下晝三點鐘度，Flora喺尖沙嘴做完嘢，就同助手去咗帝苑酒店嘅餐廳，Mike坐定等佳人出現，而助手喺呢個時候就好識趣咁消失咗大半個鐘，等Flora同Mike可以靜靜談心，共享每位一百三十八蚊嘅自助餐。
其間Flora同Mike雞啄唔斷，Flora笑得好開心，胃口又好。後來助手再到場會合，直至五點鐘左右，Mike喺銀包入面攞咗張金卡出嚟埋單，承惠五百蚊有找，之後Mike重做埋柴可夫，揸Benz送Flora同助手去紅磡火車站。
自同Flora傳出緋聞後，Mike甚少陪Flora出席公開場合，次次都係Flora收工後，佢至會出現。其實Mike愈係避嫌，愈係此地無銀，唔怪得之唔少人都話Mike似Flora男朋友多過經理人啦。
楊洛婷早前接受雜誌《HIM》訪問時講到自從選港姐之後就一直冇拍拖，雖然佢啲朋友曾經做媒人介紹男仔畀佢識，但係對方嘅條件唔啱。楊洛婷雖然喺香港出世，但係佢好細個就去咗外國讀書，所以佢都希望將來嘅男朋友嘅成長背景同佢差唔多，最重要嘅係男友要當佢好似小公主一樣咁錫佢。
洪欣最近以六位數字酬勞擔任天麥美容產品系列為期一年嘅代言人，日前佢就同另一代言人關德輝去到馬來西亞出席簽約儀式。洪欣今次喺大馬逗留咗五日，就已經忙個不停，一落機就要接受一連串嘅訪問，而當佢知道要出席一個孤兒院籌募經費嘅活動時，就專誠四出買禮物畀一班孤兒，相當有心。
王菲早排同愛郎李亞鵬同遊法國，有傳話佢哋此行係買婚紗。噚日朝早七點幾，王菲一個人由法國返港，李亞鵬就未見蹤影。其間有人見到王菲帶同大量行李出閘，滿載而歸。馮仁昭聽聞今次王菲喺法國買咗大堆來路家具，要空運返北京，相信都係為婚後搬屋而作準備。
內地演員王伯昭控告張衛健、謝霆鋒傷人一案前日第二次聆訊，在北京巿二中院開庭，王伯昭喺兩位律師同母親陪同下現身，接受記者訪問時王伯昭母親摸着兒子左臉哽咽着話：「這邊臉現在還腫着呢！」
