大編輯家人往泰國度假（復活節假），機場內人山人海，正排隊check-in之際，忽聞吵嘴之聲，見一位中年女士與一群貌似內地商人圍住國泰航空櫃枱，鬧到不亦樂乎，中年女士係香港人，更加面紅耳熱，神情激動㖭，大編輯個外甥話：「呢位女士咁好火氣，唔知係做邊行嘅呢？」
放完假返嚟，大編輯睇番《蘋果日報》，先知道有內地律師法官團數十人往台灣旅行，因不能同坐一班國泰航機，指責國泰超賣機票，班機重因此而延遲起飛。大編輯知道復活節假期係旅行出境高峯期，事先唔妥善辦理機票（例如幾十人要統一由一間旅行社辦理，先至可以保證到坐埋同一班機，如果分開booking，十人八人一組，就容易被分配到不同時段班機），偶生事端，便不可將責任推晒落航空公司度。
對航空營運熟悉嘅老友Ａ後來同大編輯講：「Overbook係全世界所有航空公司嘅營運方法，你訂咗位，到時唔上機，航空公司冇你符；每一條航線，每一時段嘅班機，會有唔同嘅noshow（不出現）比率，愈係班次頻密嘅航線，noshow比率就多啲，一個星期一班嘅航線，noshow幾乎等於零，所以航空公司會為每一班機做數字統計，制訂每一班機嘅overbook（超賣）指引，指引並非一成不變，而係時時修改。去台北嘅航機幾乎每半小時多一啲就有一班，overbook就比較多啲，好多乘客平時早到機場就搭早一班，遲到就搭遲一班，真係發生超載事件之時，航空公司就會自動派錢引誘乘客唔好上機，搭遲一班機，好多乘客唔趕時間，就會情願攞錢，讓出機位。呢套方法在全世界都係咁，一向相安無事。」
如果自己好想上機，又怕overbook，點呢？好易啫，老友Ａ話：「你早一日就去中環機鐵站check-in或者早啲去機場，check-in之後就去飲茶，包你可以輕鬆上機。」