國際油價上企歷史高位，中油香港（135）大墜後，可以炒一轉。油價04年節節上升兼創新高，加埋中油香港揸住唔少海外油田，所以，集團04年度（12月止）嘅實現油價升幅，應該比國產石油股理想。
但保守假定，中油香港去年實現油價，只係同國產油股24%升幅睇齊，集團04度（12月止）實現油價可以上到30蚊美金，比03年度多6蚊美金。每桶油每升1美蚊計，中油香港可多賺7000萬元，所以，單係受惠呢6美金升幅，中油香港可多賺4.8億元，04年度純利去到近10億元（03年度5.16億元），PE跌到得番6倍。
05年第2季度已經開展，油價重喺歷史高位上落，照計，包括中油香港在內嘅油股，05年度中期業績有着落，照理，中油香港公布04年度業績後，股價唔會無以為繼。再講，以中油香港預期8倍PE做目標，股價見1.7元，回報率3成過外，但相對其他國產油股9至11倍PE，重係落後。
深圳控股（604）嚟緊呢個星期，若然有調整，1蚊樓下，可以兜底。又講兩點：第一，深控04年頭入股路勁基建（1098）25%，路勁啱啱公布04年度（12月止）業績，純利去到3.7億元，為深控04年度貢獻上額外9000萬元純利。深控因投資有法，即將公布04年度（12月止）業績，PE有望落番單位數。第二，睇番以往3年走勢，深控0.95元至0.9元係佢嘅「長城底」，股價去到呢段水位，會有好大支持。又係before深控本月中業績公布前，股價質穿1蚊之後，可以一試。
錢雋