士郎正宗嘅《攻殼機動隊》，一直被評定為科幻電影中殿堂級經典，好難想像89年的漫畫，在人、機械、網絡世界三者間，竟然有如此前瞻的見解！最新的《攻殼機動隊STANDALONECOMPLEX》電視版，今個星期首度以DVD登陸香港；驚喜者，是一口氣將26話分2套BoxSet發售，開碟發現竟然有粵語配音，而且繙譯亦見水準，《SAC》本來就係要不斷翻煲嘅作品，如果要隔兩個星期播一集，真係要殺人！
記者：朱崇德
唔講大家未必知，據發行商PANORAMA表示，其實《攻》系列一直未正式以DVD在香港發行過！雖然劇院或電視間唔中播映過劇場版，所以今次TV版絕對是首次！呢兩套《SAC》BoxSet設計好靚仔，電鍍銀盒面配透明DVD盒，Cyber味非常濃，據知發行商好似更有意遲陣子，再加推《攻》劇場版1、2集的DVD，《攻》迷們值得留意。
查詢：DVDPRO
（23326326）
拍電影資源 製作TV動畫
《SAC》雖然係電視版本，不過日本製作向來以認真出名，尤其《攻》此類殿堂級經典，點可以馬虎了事！所以《攻》簡直係一套以拍電影的資源所製作成的動畫，由02年在日本PrerfectSkyTV放映，歷時3年時間及8億日圓製作費而完成！製作班底都是最原裝的。例如起用電影相同的製作公司ProductionI.G.、再加士郎正宗參與協助，所以TV版睇落一樣《攻》味十足。
故事背景發生在2029年，主角一樣落在草薙素子身上，並以行動主管的身份，帶領有獨立特務工作的「公安9課」，去打擊種種有關電腦及網絡上的罪行。
人、機械 模糊底線
《SAC》稟承劇場版的思想架構，今次TV版來得野心更大，《攻》系列一向以「Ghost」（靈魂）及「Shell」（肉體），去探求「人」的自我價值，儘管劇場版95年上畫，至今他的含意還是觸摸不透，截至今日網上還爭論不休！
《SAC》所投影的未來，是人身的任何部份（包括人們認為儲存靈魂的腦），都可以用電腦複製！反過來機械AI都可以同樣表現人性，機械及人的定義變得更模糊了！《SAC》以一集一集重重深入的手法，去解釋當中人、機械的模糊底線，例如第一話的偷腦（有Shell冇Ghost），及第二話將人腦植入戰車（冇Shell有Ghost），可以話是引子般，重新將電影版的「問題」放在大家面前，而且愈後話數，重會加入「網絡」的成份，假如人的「意識」存放在網絡間，甚至將「意識」強行侵入別人的軀體，那又是人嗎？如以玩味角度，《SAC》不失為一套有如《機動警察》的刺激卡通，但用心細看，內藏的理念，足可夠你寫一篇論文！
粵語配音 無記水準
今次港版3區《SAC》聲畫都做得相當唔錯，畫面光暗位都做得好清！聲效更是一絕，日文dts5.1聲效出嚟真係嘭嘭聲！不過更正係有粵語配音（2聲道），須知這片子從未在香港上過電視，粵語配音係發行公司自己做㗎！誠意已經攞滿分，更難得是繙譯做得好有水準，如果早年受過「老翻」繙譯一知半解嘅字幕之苦，就知今次《SAC》做得有幾好！而且配音員把聲好悅耳，真係好鬼有「無記」Feel，絕對熱切期待佢重推兩集《攻》的劇場版！
