恒隆集團個《恒隆數學獎》噚日舉行頒獎典禮，由執行董事吳士元（Terry）同埋世界級數學大師丘成桐教授負責頒獎，響一月做完割腦瘤大手術嘅Terry，一見到八方同個行家，就係咁問人哋覺唔覺佢有病，佢大哥話，因為之前有啲報道講到佢開完刀都重未好番，所以想趁機會講畀大家知道佢已經冇事。
講真，佢只係把聲「盟」咗少少，重好好中氣係咁同八方分享佢個「十大手術」，整個手術以最先進嘅微創技術進行……睇佢個款真係精神過八方十倍！唔信？有相為證。
其實八方一向都好驚聽或睇到呢啲手術過程，但有樣嘢真係好想同一眾以纖體為終身事業嘅人分享，就係「肥膏」原來係好有用架！Terry哥話，佢個乒乓波咁大嘅瘤原來經已存在咗十幾二十年，咁割咗之後空咗出來嘅「吉位」一定要搵啲嘢填番，醫生於是響佢個肚腩左邊割咗嚿肥膏放番落去，等約莫兩年呢嚿肥膏就會鈣化……，所以，大吉利是講句，纖體還纖體，記住留番些少肥膏以備不時之需呀！
傳真︰2623-9278
電郵︰[email protected]