金像獎餘波未了
狄龍撐元華嘲秋生大嘴巴

狄龍和趙雅芝昨日在尖沙嘴與影迷茶敍，狄龍和元華由邵氏年代已開始合作，對於早前黃秋生批評元華在《功夫》一片的演出浮誇，狄龍除以「大嘴巴」來形容秋生外，還力讚元華處理此事圓滑得體，既有風度又有厚道，令人有下台階。

狄龍與趙雅芝昨日在尖沙嘴與一班影迷茶敍，宣傳二人合演的古裝劇《楊門虎將》。狄龍近年主力在內地拍劇，不過他仍相當關心香港影圈的發展和情況，對於香港電影金像獎主席文雋與有線電視的徐小明因為採訪問題而起的爭拗，他亦有所聞。

「迫死人就冇意思」
狄龍昨日說：「冇所謂，每年都有爭拗，好快就冇事，冇話啱定錯，只係立場問題，好似華哥（元華），我同佢喺邵氏合作好多，佢好有風度，好難得，秋生一向都係大嘴巴，華哥就答得圓滑得體，處變不驚，大智若愚，成件事處理得唔錯，令人有下台階，好有厚道，迫死人就冇意思，禍從口出，但係唔講又冇得寫，都係各得其所，正如阿Sam首歌講，命裏有時終須有，命裏無時莫強求。」

「成龍應該贏影帝」
對於「金像影帝」一獎落在梁朝偉手，狄龍並不認同，他說：「我覺得成龍應該贏，因為冇人做到佢嘅動作，但梁朝偉個角色好多人都做到，偉仔攞第五次，我個人覺得偉仔應該收手。動作片唔易拍，評審對動作片一知半解，唔知乜叫動作，我都唔想得罪人，唔係就變成第二個黃秋生，講完就算。」
採訪、攝影：魯萍